Goa Crime News

पर्वरी: एस्कॉर्ट मुली पुरवण्याच्या नावाखाली पर्यटकांची लुबाडणूक आणि खंडणी उकळणाऱ्या आंतरराज्य रॅकेटचा गोवा पोलिसांनी पर्दाफाश केला आहे. पर्वरी पोलिसांनी याप्रकरणी मुंबई आणि पश्चिम बंगाल येथील दोन महिलांना अटक केली आहे. याप्रकरणी कांदोळी येथील एका टॅक्सी चालकाला देखील अटक करण्यात आलीय.

बबिता रमेश उपाध्याय (२८ रा. मुंबई) आणि सुतापा बॅनर्जी (३८, रा. पश्चिम बंगाल) असे अटक करण्यात आलेल्या दोन महिलांची नावे आहेत. मुंबईला पसार होण्याच्या तयारीत असणाऱ्या या दोन्ही महिलांना पर्वरी पोलिसांनी अटक केली.

याप्रकरणी सागर नईम अन्सारी (२७, लुधियाना, पंजाब) यांनी पर्वरी पोलिसांत तक्रार दाखल केली होती. अन्सारी यांच्यासह त्यांच्या मित्राला हॉटेलमध्ये मारहाण करुन २० हजार रुपये लुटल्याची तक्रार त्यांनी दाखल केली होती.

पोलिसांनी याप्रकरणी भारतीय न्याय संहिता कलम ३०९ (४) आणि ३(५) गुन्हा नोंद करत, दोन तासांत गुन्ह्याचा छडा लावत दोन महिलांना अटक केली.

पोलिसांनी दिलेल्या माहितीनुसार, संशयित अटक महिला पुरुष पर्यटकांना एस्कॉर्ट मुली पुरवण्याच्या नावाखाली त्यांच्यावर बलात्काराचा खोटा गुन्हा दाखल करण्याची धमकी देत होत्या. पर्यटकांना ब्लॅकमेल करुन त्यांच्याकडून पैसे उकळत होत्या. याप्रकरणी तक्रार समोर येताच पोलिसांनी दोन महिलांना अटक केली. या प्रकरणाचा पुढील तपास पोलिस निरीक्षक अरुण शिरोडकर करत आहेत.