सत्तरी तालुक्यात विजेची समस्या गंभीरच होत चालली आहे. पावसाच्या पहिल्याच थेंबात वीज पुरवठा खंडित होणे नित्याचेच बनले आहे. विशेषतः नगरगाव पंचायत भागातील अनेक गावात वीज समस्या जटीलच बनली आहे. वीज बंच केबल अगदी त्रासादायक ठरत आहेत.

नगरगाव पंचायत भागाताल गावात वारंवार वीज गायब होते आहे. काल रविवारी नगरगाव पंचायत भागातील सुमारे आठ ते नऊ गावांमध्ये रात्री १० वाजता गेलेली वीज आज सोमवारी सायंकाळी ४.३० च्या सुमारास अठरा तासांनी पूर्ववत झाली होती.

काल रात्री पासून वीज पुरवठा खंडितच होता. केवळ पावसामुळे वारंवार वीज खंडित होण्याचे कारण तरी काय, असा सवाल करून लोकांनी संताप व्यक्त केला आहे.

नगरगाव कोदाळ नानोडा मार्गावर येथे भागात वारंवार बंच केबल शॉर्ट सर्किट होऊन जळत असते. त्यामुळे बंच केबल चांगल्या प्रतीच्या घातलेल्या नाहीत असा आरोप होत आहे. शहरात दोन मिनिटे वीज पुरवठा खंडित झाला तर लोकांना लगेच त्रास होऊ लागतो.

पण ग्रामीण भागात मात्र लोकांनी कितीही आवाज उठविला तर त्याकडे वीज खात्याकडून दुर्लक्ष केले जाते. नगरगाव पंचायत भागात दररोज बंच केबल शॉर्ट सर्किट होऊन जळतात.

ऐन पावसाळ्यात नळ कोरडे !

नगरगावसह धावे, उस्ते, बांबर, नानोडा, कोदाळ, साट्रे, तार, माळोली, देरोडे, माळोली या गावांत वीज खंडित झाल्याने आज दिवसभर पाणी पुरवठा लोकांना करता आला नाही. त्यामुळे एकडे मुसळधार पाऊस कोसळत असताना देखील वीज खंडित होत असल्याने जलप्रकल्पातील काम ठप्प होऊन पाणीपुरवठा थांबतो, परिणामी ऐन पावसात नळ मात्र कोरडे होण्याची वेळ आली आहे.

ना वादळ-वारा, ना पडझड, तरीही बत्ती गुल ?

ना मोठे वादळ, ना विजेचा लखलखाट, ना ढगांचा गडगडाट तरीही सात्यत्याने नगरगाव पंचायत भागात धावे, उस्ते, बांबर, नानोडा, कोदाळ, साट्रे, तार, माळोली, देरोडे, माळोली आदी गावांत वीज पुरवठा वारंवार खंडित होत आहे.

निरूपयोगी बंच केबल काय कामाच्या अशी संतप्त प्रतिक्रिया नगरगाव पंचायत भागातील लोकांतून व्यक्त होत आहेत. वीज खाते यावर कायमस्वरूपी तोडगा काढण्यास असमर्थ ठरली आहे.