Electricity Problem in Borim: राज्यात पावसाने आपली हजेरी लावल्यानंतर लगेचच विजेच्या लपंडावालाही सुरुवात झाली आहे. ग्रामीण भागासोबतच शहरी भागातही वीजपुरवठा खंडित होण्याच्या घटना वाढल्या आहेत. यामध्ये नागरिकांना नाहक त्रास सहन करावा लागत असून बराच वेळ वीज नसल्याने कामांचा खोळंबा होत असल्याची तक्रार नागरिक करत आहेत.

फोंड्यातील बोरी गावातील सर्वच भागात वारंवार वीज खंडित होण्याचे प्रकार वाढल्याने नागरिक हैराण झाले आहेत. या भागात मे महिन्यापासूनच वीज खंडित होण्याच्या प्रकारात वाढ झालेली आहे.

एकदा वीजपुरवठा खंडित झाला की तो सुरळीत व्हायला बराच काळ जातो. तोपर्यंत लोकांना अंधारात राहण्याची वेळ येते.

दिवसाही हेच प्रकार घडल्याने विजेवर चालणारे लहान मोठे उद्योगधंदे बंद ठेवावे लागल्याने उद्योजकांना आर्थिक नुकसान सोसावे लागते. रात्रीच्या वेळी वीजपुरवठा खंडित झाल्यावर पंखे चालत नसल्याने डासांचा उपद्रवही वाढतो व लोकांची झोपमोड होते. वीज खात्याने याप्रकरणी लक्ष पुरवून वीजपुरवठा खंडित होण्याची कारणे शोधून काढून उपाययोजना करावी, अशी त्रस्त नागरिक मागणी करत आहेत.