Goa Traffic Police राज्यातील रस्ते अपघातांचे वाढते प्रमाण लक्षात घेऊन वाहतूक नियंत्रणात ठेवण्यासह नियमांचे उल्लंघन टाळण्यासाठी नवी अत्याधुनिक कॅमेरा यंत्रणा एक जूनपासून कार्यान्वित होणार असल्याची माहिती वाहतूकमंत्री माविन गुदिन्हो यांनी गुरुवारी दिली.

यामुळे वाहतूक नियमांचे उल्लंघन केल्यास त्यावर होणारी दंडात्मक कारवाई यापुढे ई-चलनच्या माध्यमातून संबंधित वाहनधारकांवर होणार आहे. त्यामुळे यापुढे राष्ट्रीय महामार्गावर वाहन चालवताना वाहतुकीचे नियम पाळणे अनिवार्य आहे.

एआय पॉवर्ड इंटेलिजंट ट्रॅफिक मॅनेजमेंट सिस्टमकडून ही यंत्रणा कार्यान्वित केली जाणार असून त्यांच्याकडूनच संबंधित वाहनधारकांना ई-चलन पाठवण्यात येणार आहे. यातून जो महसूल मिळेल, त्यापैकी काही पैसे या कंपनीला मिळतील, तर उर्वरित महसूल सरकारला मिळणार आहे.

ई-चलन आणि एसएमएसही

बेकायदेशीर वाहतूक करणाऱ्यांबरोबरच वाहतुकीच्या नियमांचे उल्लंघन करणाऱ्यांवर कडक कारवाई केली जाणार आहे. या कॅमेराद्वारे वाहतुकीचे निरीक्षण करून त्यात नियमांचे उल्लंघन आढळल्यास संबंधितांच्या मोबाईलवर हे ई-चलन पाठवण्यात येईल.

सोबत एसएमएसही पाठवण्यात येईल. हा दंड भरण्यासाठी वाहनधारकाला वाहतूक विभाग किंवा पोलिसांच्या वाहतूक शाखेची मदत घ्यावी लागेल, असेही वाहतूकमंत्री माविन गुदिन्हो म्हणाले.

या नव्या प्रणालीतील सीसीटीव्ही कॅमेरे 1 जूनपासून कार्यान्वित केले जातील. ही अत्याधुनिक यंत्रणा सध्या जरी सज्ज असली तरी लोकांमध्ये त्याविषयी जनजागृती व्हावी आणि यासाठी पुरेसा अवधी मिळावा म्हणून ही यंत्रणा 1 जूनपासून सुरू करण्यात येत आहे. पणजी, पर्वरी आणि मेरशी सर्कलवर हे स्मार्ट कॅमेरे बसवण्यात आले आहेत.

- माविन गुदिन्हो, वाहतूकमंत्री.