फोंडा: गोवा पर्यटन विकास महामंडळाने (जीटीडीसी) केलेला करार रद्द करुन आमची ऑनलाईन वेबसाईट आम्हाला परत द्यावी. २ ऑक्टोबरपूर्वी आमच्या मागण्या पूर्ण केल्या नाही तर आम्ही २ ऑक्टोबरपासून सर्व जीप ऑफलाईन सोडणार, असा इशारा जीप टूर असोसिएशनचे अध्यक्ष निलेश वेळीप यांनी दिला आहे. कुळे जीप असोसिएशनच्या सर्वसाधारण सभेतही तसा ठरावही मंजुर करण्यात आल्याचे त्यांनी सांगितले.

‘जीटीडीसी’ अंतर्गत जीप व्यवसायाशी जो करार केला आहे, त्या करारनुसार आमची पूर्वीची वेबसाईट घेऊन आम्हाला फसविले आहे. त्यामुळे आम्हाला ते मान्य नाही. यासाठी आम्ही एकत्रितपणे निर्णय घेऊन मुख्यमंत्री प्रमोद सावंत यांच्याकडे आमच्या समस्या मांडल्या.

आता दोन वर्ष झाली मात्र समस्या सुटलेल्या नाहीत. सरकारने आमच्या मागण्या पूर्ण कराव्यात, असे दूधसागर जीप टूर असोसिएशनच्या पदाधिकाऱ्यांनी सांगितले. वेळीप म्हणाले की, २ ऑक्टोबरपासून दूधसागर पर्यटन व्यवसाय चालू होणार आहे. त्यापूर्वी आमच्या मागण्या सरकारने पूर्ण कराव्यात. अन्यथा आम्ही ऑफलाईन गाड्या सोडण्याचा निर्णय घेणार आहोत.

दरम्यान, जीप टूर असोसिएशनचा हा प्रश्‍न अनेक महिन्यापासून प्रलंबित आहे. आपल्याला नुकसान होत असून त्याची भरपाई कोण देणार असा प्रश्‍न आजच्या बैठकीत संघटनेतील काही सदस्यांनी उपस्थित केला.

आश्वासनानंतर आंदोलन घेतले होते मागे

दूधसागर जीप असोसिएशनने ज्यावेळी आंदोलन केले होते त्यावेळी राज्यसभा खासदार विनय तेंडुलकर यांनी गणेश चतुर्थीपुर्वी दूधसागर असोसिएशनचा प्रश्न मुख्यमंत्र्यासोबत चर्चा करून मार्गी लावणार असल्याचे सांगितले होते. त्यांच्या या आश्वासनामुळे असोसिएशनच्या पदाधिकारी आंदोलन मागे घेतले होते परंतु, मागण्या अजूनही पूर्ण न झाल्याने पदाधिकारी व जीप सदस्यामध्ये प्रचंड नाराजी आहे. आजच्या बैठकीत तसा संताप व्यक्त करण्यात आला.