फोंडा : राज्यात ठिकठिकाणी अमली पदार्थांची तस्करी होत असतानाच माशेलात एका तरुणाला अमली पदार्थ बाळगल्याप्रकरणी पोलिसांनी बेड्या ठोकल्या आहेत. सूरज साह असं या आरोपीचं नाव असून त्याच्याकडून सुमारे दीड लाखांचा मुद्देमाल हस्तगत करण्यात आला आहे.

फोंडा (Ponda) पोलिसांनी माशेल येथील जुन्या बसस्थानक परिसरात छापा टाकला. पोलिसांना मिळालेल्या टीपनुसार छापा टाकून सूरज उर्फ रामप्रताप साह (कुंभारजुवे, मूळ बिहार) याला अटक करण्यात आली आहे. त्याच्याकडून सुमारे 1.30 लाखांचा गांजा जप्त करण्यात आला आहे. या तरुणाकडे गांजा कुठून आला, त्याच्यासोबत त्याचे साथीदार कोण आहेत या गोष्टींचा तपास पोलिसांनी (Police) सुरु केला आहे. गोव्यात पर्यटकांची संख्या वाढतानाच आता अमली पदार्थांच्या तस्करीतही मोठी वाढ झाली आहे.

क्राईम ब्रँचने 30 मार्च रोजी रात्री मडगाव आणि वेर्णा या दोन ठिकाणी मोठी कारवाई केली. या कारवाईत उत्तर प्रदेशमधील दोघा संशययितांना अटक करण्यात आली. तर त्यांच्याकडून 8.58 लाख रुपयांचा गांजा जप्त करण्यात आला. तर 24 फेब्रुवारी रोजी मडगाव (Madgaon) परिसरात छापा टाकून रियाझ शेख (37, नावेली) याला अटक करुन आरोपीकडून 4 लाखांचा 4 किलो गांजा जप्त करण्यात आला होता. तसंच 30 जानेवारी रोजी सांगोल्डा येथे पोलिसांनी छापा टाकून भरत कृष्णा (25, आंध्रप्रदेश) यास अटक केली. त्याच्याकडून जवळपास 7.5 लाखांचा साडे सात किलो गांजा जप्त केला होता. तर वास्को पोलिसांनी 25 जानेवारी रोजी एक किलो 21 ग्रॅम गांजा जप्त केला होता.