पिसुर्ले: मनुष्य जीवनात रक्तदान करणे हे फार मोठे पुण्याचे कार्य आहे, ज्या प्रमाणे डॉक्टर रुग्णांचे प्राण वाचवतो त्या प्रमाणे रक्तदान करणारा हा तीन माणसांचा जीव वाचवतो. त्यामुळे अशा महान कार्यास सहभागी होण्यासाठी सर्वांनी पुढाकार घेतला पाहिजे, असे उद्‍गार पर्ये मतदारसंघाच्या आमदार डॉ. दिव्या राणे यांनी काढले.

पर्ये भाजप मंडळाच्यावतीने अडवई-सत्तरी येथे आयोजित केलेल्या रक्तदान शिबिराच्या उद्‍घाटन कार्यक्रमात त्या प्रमुख पाहुण्या म्हणून बोलत होत्या. यावेळी केरी जिल्हा पंचायत सदस्या देवयानी गावस, भिरोंडा पंचायतीचे सरपंच आद्राद तेरेजा, वाळपई सामाजिक आरोग्य केंद्राचे डॉ. शाम काणकोणकर, डॉ. अभिजीत वाडकर, सामाजिक कार्यकर्ते विनोद शिंदे, आदी मान्यवर उपस्थित होते.

डॉ. दिव्या राणे म्हणाल्या की, केंद्रातील आणि राज्यातील डब्बल इंजिन सरकार हे सामान्य जनतेला केंद्रस्थानी ठेवून विकास करीत आहे. त्यामुळे भारतीय जनता पक्षाच्या स्थापना दिवसाचे औचित्य साधून रक्ताची सोय करून देण्यासाठी रक्तदान शिबिरे आयोजित करण्यात येत आहेत, असेही त्या म्हणाल्या.

डॉ. शाम काणकोणकर यांनी सरकार तसेच आरोग्यमंत्री विश्वजित राणे यांच्या सहकार्याने आरोग्य खात्याच्यावतीने राबविण्यात येणाऱ्या योजनांची माहिती दिली. भिरोंडाचे सरपंच आद्राद तेरेजा यांनी स्वागत केले. पंच उदयसिंह राणे यांनी सूत्रसंचालन केले. शिबिरात सुमारे ४० रक्तदात्यांनी सहभाग नोंदवला.

भिरोंडातील समस्या सोडवणारच!

पर्ये मतदारसंघातील जनतेने आपल्याला भरघोस मतांची आघाडी देऊन आपल्याला सेवा करण्याची संधी उपलब्ध करून दिली आहे, त्या संधीचे सोने करताना आपण पर्ये मतदारसंघात अपूर्ण असलेला विकास पुढे नेणार आहे, त्यासाठी राज्याचे आरोग्य तथा वनमंत्री विश्वजित राणे यांचे सहकार्य लाभणार आहे. भिरोंडा पंचायत क्षेत्रातील जनतेला सतावणाऱ्या समस्या सोडविण्यासाठी आपण प्रयत्नशील राहणार असून त्यासाठी ज्या काही समस्या असतील त्या लेखी स्वरूपात सादर कराव्यात, पर्ये मतदार संघातील जनतेच्या समस्या ऐकून घेण्यासाठी आपण आठवड्यातून एक दिवस वाळपई येथील कार्यालयात उपस्थित असल्याचेही त्यांनी सांगितले.