Morjim: आमच्या निसर्गसंपन्न मोरजी गावचे सिमेंटचे जंगल होऊ नये,यासाठी आताच सर्वजण जागे व्हा, गोव्याबाहरचे लोक येऊन येथील जमिनी खरेदी करतात.आणि मोठमोठाले प्रकल्प उभारून येथील शांतता तसेच गावचे पर्यावरण बिघडवून टाकतात.

हे रोखण्यासाठी संबंधितांना सद्‍बुद्धी द्यावी,असे मोरजीतील युवकांनी मोरजाई देवी तसेच कळस मांगर येथील सार्वजनिक गणेशोत्सव मंडळाच्या मंडपात गणपती बाप्पाला गाऱ्हाणे घातले. मोरजी गावचे पर्यावरण आणि गावचे गावपण टिकून रहायला हवे, गावात प्रदूषणकारी आणि पर्यावरणास घातक प्रकल्प येऊ नयेत,यासाठी मोरजीवासीयांनी जागे व्हावे,असे आवाहन करण्यात आले.

शेती बुजवून हॉटेल्स उभारली जातात. कॉंक्रिटचे जंगल आजच रोखले नाही, तर उद्या मुलांना आम्ही निसर्ग दाखवू शकणार नाही. घाबरू नका, पुढे या,असे आवाहन युवकांनी केले.

पंचायत कुठे आहे?

परप्रांतीयांना तात्काळ कुपनलिका खोदून पाणी उपलब्ध करून दिले जाते. मात्र, प्रत्येक वाड्यावर पाण्याची समस्या जाणवत आहे. गावच्या समस्यांसाठी आम्ही पुढे येतो,पण पंचसदस्यांना वेळ नसतो, असा संताप काही युवकांनी व्यक्त केला.