फोंडा: मगोपचे नेते तथा वीजमंत्री सुदिन ढवळीकर यांना १९९९ च्या निवडणुकीवेळी मगोपचे तिकीट देण्यासाठी मी आणि विनोद नागेशकर हे कारणीभूत आहोत, असे खोटे सांगून प्रियोळचे आमदार तथा कला व संस्कृती मंत्री गोविंद गावडे यांनी लोकांची दिशाभूल करू नये, असे स्पष्ट मत बांदोडा मतदारसंघाचे माजी जिल्हा पंचायत सदस्य विनोद नागेशकर यांनी व्यक्त केले.

फोंड्यात शुक्रवारी (०४ एप्रिल) आयोजित पत्रकार परिषदेत नागेशकर बोलत होते. यावेळी मगोप कार्यकारिणीचे सदस्य अनिल नाईक तसेच बांदोड्याचे पंचसदस्य सुखानंद कुर्पासकर आदी उपस्थित होते. नागेशकर म्हणाले, मी गेली १५ वर्षे राजकारणापासून अलिप्त आहे. मात्र, मगोपच्या वादात माझे नाव गावडे यांच्याकडून गोवले गेल्यामुळेच तसेच अनेकांकडून मला या प्रकरणाविषयी विचारणा झाल्यामुळेच मला पत्रकारांसमोर जाणे इष्ट वाटले.

गावडेंच्या 'त्या' वक्तव्याने दुखावलो

नागेशकर यांनी गोविंद गावडे यांच्या विधानाचे खंडन करताना खोटे सांगू नका, खरे काय ते बोला, असे सुनावले. सुदिन ढवळीकर यांच्याशी माझा वाद असला तरी ढवळीकर कुटुंबीयांशी माझे पूर्वीपासून चांगले संबंध होते आणि आहेत. माधवराव ढवळीकर यांच्याशी तर अतिशय चांगले संबंध होते. त्यामुळेच मगोपला ढवळीकर यांच्या गोठ्यात नेऊन बांधण्याच्या वक्तव्यामुळे मी दुखावलो, असे नागेशकर म्हणाले.

मुख्यमंत्री प्रमोद सावंत यांनी प्रियोळ मतदारसंघाबाबत केलेल्या वक्तव्यानंतर भाजप आणि मगोप यांच्यात वादाची ठिणगी पडली. मंत्री गोविंद गावडेंनी थेट ढवळीकर बंधुंवर टीका करायला सुरुवात केली. सरकारमधील विद्यमान सुदिन ढवळीकरांनी मी राजकारणात आणल्याचा दावा करत ती आयुष्यातील मोठी चूक होती, असा दावा गोविंद गावडे यांनी केला होता. तसेच, ढवळीकरांनी गोव्यातील बहुजनांना संपविण्याचा प्रयत्न केल्याचा आरोप देखील त्यांनी केला होता.