लोकसभा निवडणुकीत दोन्ही जागा भाजपच जिंकेल, असे विधान माजी आमदार चर्चिल आलेमाव यांनी केले आहे, त्यावर फातोर्डाचे आमदार विजय सरदेसाई यांनी प्रश्र्न केला की, चर्चिल कधीपासून ज्योतिषी बनले? जो पक्ष लोकांच्या अपेक्षा पूर्ण करेल, लोकहिताचे प्रकल्प, योजना राबविल, त्यालाच लोक संधी देतील. सरदेसाई यांनी सरकार व मडगाव नगरपालिकेला सार्वजनिक हिताचे प्रकल्प अडवू नका, असेही ठणकावले.

12 लाख रुपये खर्चून जलस्रोत खात्यातर्फे फातोर्डा प्रभाग दोनमधील डोंगरवाड्यावर नवा नाला बांधण्यात येत आहे. या कामाच्या शुभारंभप्रसंगी सरदेसाई बोलत होते. यावेळी अन्‍य मान्‍यवरही उपस्‍थित होते.

कामे बिल्डरच्या फायद्याची

दिगंबर कामत हे सध्या नैराश्‍यातून जात आहेत. त्‍यांनी मडगाव मतदारसंघातील प्रकल्प व योजनांवर लक्ष केंद्रित करावे. सध्या जी कामे सुरू आहेत, ती कोणत्या बिल्डरच्या फायद्याची आहेत, याची यादीच मी तयार ठेवली आहे. लवकरच एकेक नाव जाहीर करेन, असा इशारा सरदेसाई यांनी दिला.

नगराध्यक्षांवर साधला निशाणा

‘जीसुडा’तर्फे जे प्रकल्प हाती घेतले जातात, ते पालिकेची मान्यता मिळाल्यावरच सुरू होतात. पण अद्याप ही जागा ‘जीसु़डा’च्या स्वाधीन केलेली नाही, असे नगराध्यक्ष म्हणतात त्याला काहीच अर्थ नाही. अशा प्रकल्पासाठी हस्तांतरण ही संकल्पनाच नसते. पण नगराध्यक्ष हे मडगावच्या आमदारांच्या हातचे बाहुले आहेत. हा प्रकल्प झाला तर पार्किंग समस्या सुटेल, असेही सरदेसाई म्हणाले.

‘ते’सुद्धा एकाच माळेचे मणी

चर्चिल प्रत्येक वेळी भाजपलाच पाठिंबा देत आले आहेत. त्यामुळे त्यांच्या विधानाबाबत नवल नाही. येत्या पावसाळ्यात बाणावलीत पूरस्थिती निर्माण होण्याची भीती सरदेसाई यांनी व्यक्त केली. कुडतरीचे आमदार आलेक्स रेजिनाल्ड लॉरेन्सबद्दल सरदेसाई म्हणाले की, तेसुद्धा आता एकाच माळेचे मणी झाले आहेत.