Dona Paula Jetty: पर्यटकांचे आकर्षण असणारी दोनापावला जेटी नूतनीकरणानंतर मागील वर्षी डिसेंबरच्या 5 रोजी खुली होईल, असे आश्‍वासन पर्यटनमंत्री रोहन खंवटे व महूसलमंत्री तथा पणजीचे आमदार बाबूश मोन्सेरात यांनी दिले होते.

डिसेंबरची आणि जानेवारी 2023 मधील 5 तारीखही गेली, तरीही ही जेटी काही खुली झालेली नाही. विशेष म्हणजे पर्यटकांचा ओघ कायम असला, तरी ती कधी खुली होणार याविषयी त्यांच्यात उत्सुकता असल्याचे दिसून येत आहे.

गेल्या तीन-साडेतीन वर्षांपासून जेटी पर्यटकांसाठी बंद आहे. जेटीचे नूतनीकरणाचे काम पूर्णही झाले आहे. त्यामुळे डिसेंबर महिन्यात पर्यटकांना ती खुली होईल, असे चित्र होते. नोव्हेंबर महिन्यातील पर्यटन खात्याच्या बैठकीनंतर पर्यटनमंत्री रोहन खंवटे यांनी ही जेटी 5 डिसेंबरला खुली होईल, असे सांगितले होते.

मंत्री बाबूश मोन्सेरात यांनीही हीच री ओढली होती. त्यामुळे डिसेंबरमध्ये राज्यात मोठ्या संख्येने येणाऱ्या पर्यटकांचा ओढा या जेटीकडे जाईल, असे वाटत होते.

पाहणी होणार कधी?

जेटीवरील व्यावसायिकांनी निर्माण झालेल्या नव्या दुकानांच्या गाळ्यांविषयी आक्षेप घेतल्यामुळे ते बदलण्याचा निर्णय घेण्यात आला. केंद्रीय पर्यटन खात्याच्या अभियंत्यांकडून त्याची पाहणी होणे अपेक्षित होते,

परंतु त्या अभियंत्यांसाठी दुकानाचा नवा पॅटर्न तयार करून ठेवला आहे. त्यामुळे या पॅटर्नची पाहणी करून केंद्रीय पर्यटन खात्याकडून त्यास मंजुरी मिळाल्यानंतरच जुनी दुकाने हटविली जातील, परंतु अद्याप कोणी पाहणी केली नाही.