दाबोळी: दिवाळी (Diwali) जवळ येताच गोवेकरांना वेध लागतात ते नरकासूर बनविण्याचे. नरकासूर बनविण्यास राज्यात विविध ठिकाणी लगबग सुरू झाली आहे. दिवाळीला अवघे काही दिवस राहिल्याने रविवारी सुट्टीच्या दिवशी युवक नरकासुराच्या प्रतिमा करण्यास गुंतल्याचे दिसून आले. यामध्ये लहान मुलांचाही सहभाग होता. लोखंडी सळ्याचा साचा व लाकडी साहित्याचा (Wooden Material) वापर करुन तयार केलेले नरकासुराचे सांगाडे ठिकठिकाणी रस्त्यानजीक उभारलेले दिसत आहेत.

वास्कोतही युवक रात्र जागवून नरकासुराच्या प्रतिमा तयार करत आहेत. तरुण मुलांबरोबरच लहान मुले उत्साहाने नरकासूर करताना दिसतात. अद्याप मुलांची परीक्षा संपलेली नसल्याने त्यांचे अर्धे लक्ष नरकासूर तयार करण्याकडे लागलेले आहे. रविवारी सुट्टीच्या दिवशी मुलांनी नरकासूर तयारकरायला सुरवात केली.वास्को,बायणा,मांगूरहील,सडा,नवेवाडे,दाबोळी आदी भागात नरकासूर बनविणे जोमाने सुरू आहे.

नरकासुराचा मातीचा मुखवटा तयार करण्यासाठी देखील मुले जुंपलेली आहेत. मातीपासून मुखवटे (Masks) तयार करून त्यांना कागद चिकटवित आहेत. मातीच्या मुखवट्यांना कागद चिकटविल्यानंतर त्याला सुकायला ठेवले जात आहे. त्यानंतर त्यालारंगकाम केले जाणार असून आक्राळ विक्राळ नरकासुराचा चेहरा तयार केला जाईल. वेळेचे नियोजन लक्षात घेऊन मुले कामाला लागली आहेत.

नरकासूर करण्यासाठी प्लास्टिक (Plastic) ऐवजी गवत आणि कागद (Grass and paper) या वस्तूंचा वापर केला जात आहे. नरकासूर करताना तरुणांकडून पर्यावरणाचेही भान राखले जात असल्याचे दिसतआहे. त्यामुळे प्लास्टिक शक्य टाळण्याचा त्यांचा प्रयत्न दिसत आहे. लहान मुले बांबूपासून लहान नरकासूर तयार करीत आहेत.

दरम्यान राज्यात पावसाचा (Rain) ओघ कमी झाल्याने नरकासुराच्या प्रति तयार करण्याला वेग आला आहे. कडक उन्हामुळे ठिकठिकाणी युवक नरकासुराच्या प्रतिमा करण्यासाठी व्यग्र आहेत. खास करून दैनदिन कार्य आटोपून रात्रीच्यावेळी युवक नरकासुराच्या प्रतिमा तयार करत आहेत. पावसाने जरी अधूनमधून हजेरी लावली तरी प्रतिमा भिजू नये यासाठी दक्षता घेतली जात आहे.

दिवाळीत आकाशकंदील हे देखील एक वेगळे आकर्षण असते. काहीजण आकाश कंदील बाजारातून विकत आणून दिवाळीत रंगवतात, तर काहींसाठी दिवाळीतील मजा ही एकत्र येऊन छोटाच का होईना पण मिळून आकाशकंदील बनवतात. दिवाळीनिमित्त होणाऱ्या आकाशकंदील स्पर्धेसाठी (competition) काहीजणांकडून प्रयत्न सुरू आहेत. त्यासाठी आवश्यक कागद, माडांच्या झावळ्या, आइस्क्रिमचे चमचे, रंगीत कागद, दोरी, बाटलीचे झाकण आदी साहित्य जमविण्यास सुरूवात झाली आहे.

दरम्यान यंदा वास्कोत नरकासूर स्पर्धा होणार की नाही यात शाशंकता निर्माण झाली असली तरी वाड्यावाड्यावर नरकासूर प्रतिमा तयार करण्याकडे चालूच ठेवले आहे. मात्र वास्कोत लहान मोठ्या स्पर्धा होणार. त्याविषयी फलकही झळकलेले आहे.निवडणूक (Election) काळ असल्याने युवकांत एकप्रकारे जोश निर्माण झाला आहे.