वाळपई: निवडणुकीत प्रचंड मताधिक्य मिळाले. त्यासाठी पर्ये मतदारसंघातील मतदारांचे आपण आभारी आहे. निवडणुकीत आम्ही जी आश्वासने जनतेला दिली आहेत, ती येत्या पाच वर्षांत पूर्ण करण्यासाठी सदोदित कार्यरत राहणार आहे. विकास हाच ध्यास आहे व त्यासाठी पर्ये मतदारसंघात सर्वांगीण विकासासाठी आपण नेहमीच कटिबद्ध राहणार आहे, अशी ग्वाही पर्येच्या आमदार दिव्या विश्वजित राणे यांनी दिली.

म्हाऊस ग्रामपंचायत क्षेत्रात आज (शुक्रवारी) जाहीर आभार सभेत त्या बोलत होत्या. वनमंत्री विश्वजित प्र. राणे, विनोद शिंदे, म्हाऊस सरपंचच्या वंदना गावस, पंच कृष्णा गावकर, अशोक गावकर, कुंजल गावस, विठू वरक, देवस्थानाचे अध्यक्ष अनंत गावकर, पोपट गावकर, केरी जिल्हा पंचायत सदस्य देवयानी गावस उपस्थिती होत्या. विनोद शिंदे यांचा पुष्पहार घालून सरपंच वंदना गावस यांनी सन्मान केला.

सत्तरी तालुका विकासमय करू

विश्वजित म्हणाले, सत्तरी तालुक्यात गेली पंधरा वर्षे राजकारणात आहे. यावेळी महत्त्वाची पाच सरकारी खाती मिळाली आहेत, त्याचा सदुपयोग करून सत्तरी तालुक्याला विकासमय तालुका म्हणून लौकीक प्राप्त करून देण्यास मी वचनबद्ध आहे. वन, आरोग्य, महिला बाल विकास, नगरनियोजन, नगरविकास यामार्फत सत्तरीच्या जनतेला योग्य तो लाभ मिळेल.