Goa: कला व संस्कृती खात्यात 2019 मध्ये संगीत प्रशिक्षक व संगीत साथीदार या पदांसाठी मुलाखती (Interview) घेऊन ती पदे अगदी अलीकडे भरली गेली आहेत. निवड समितीने निवडलेल्या बऱ्याच उमेदवारांना डावलून वशिल्याचे टट्टू तिथे भरती केल्याचे उघड झाले असून काही उमेदवार माहिती हक्क कायद्याखाली त्यासंदर्भात माहिती मागवत असल्याची माहिती सूत्रांकडून मिळाली आहे.

या उमेदवारांची निवड करण्यासाठी कला अकादमीच्या (Kala Academy) हिंदुस्थानी संगीत विभागातीलच शिक्षकांची निवड समितीवर नेमणूक केली होती. कारण या खात्याचे मंत्री कला अकादमीचेही अध्यक्ष आहेत. त्यामुळे आपल्या मर्जीप्रमाणे काही उमेदवारांना वशिल्याने घेताना अडचण येणार नाही, याची त्यांना खात्री होती. त्याप्रमाणे मंत्री महोदयानी निवड समितीवरील त्या संगीत शिक्षकांपैकी एकेकट्याला मंत्रालयातील केबिनमध्ये बोलावून निकालात फरक करायला भाग पाडले, असे समजल्याचे ज्येष्ठ कलाकार मुरारी कांदोळकर यांनी सांगितले.

राज्य सांस्कृतिक पुरस्कारात झालेल्या वशिलेबाजीमुळे अनेक कलाकार, साहित्यिक खवळले आहेत. कला अकादमीच्या हिंदुस्थानी संगीत विभागात तबला साथीदारांची पदे भरताना अशीच वशिलेबाजी करण्यात आल्याची चर्चा सुरू आहे. त्या पदासाठी एका तबलावादक युवतीची निवड झाली असताना तिला डावलून शास्त्रीय गायन (Classical Music) वादनाला साथ कशी करतात, याचा गंधही नसलेल्या ताळगाव येथील एका नवख्या वादकाची निवड करायला निवड समितीवरील कलाकाराला भाग पाडले, हे आता लपून राहिलेले नाही, असेही कांदोळकर म्हणाले.