Dangerous Roads in Goa: मोरजी : वीजेचा प्रश्न कायमस्वरूपी सोडवण्यासाठी सध्या सरकारकडून पेडणे तालुक्यातील मांद्रे मतदारसंघातील किनारी भागात भूमिगत वीज वाहिन्या टाकण्यासाठी मोठ्या प्रमाणात रस्त्यांचे खोदकाम केले जात आहे. त्यामुळे येथील रस्ते वाहतुकीसाठी धोकादायक बनले आहेत.

खोदकाम केलेले रस्ते व्यवस्थित बुजवले जात नसल्याने अपघाताला कारणीभूत ठरत आहेत. शिवाय धुळीचे साम्राज्य पसरलेले आहे. त्यामुळे जीवीतहानी होण्याचा धोका असून याकडे तत्काळ लक्ष द्यावे. खोदकाम केलेले रस्त्यांचे हॉट मिक्स पद्धतीने डांबरीकरण करावे अशी मागणी नागरिकांतून होत आहे.

वीज खात्यामार्फत अंडरग्राउंड केबलसाठी सध्या मांद्रे मतदारसंघात मोठ्या प्रमाणात रस्त्यांचे खोदकाम सुरू आहे. एखाद्या परिसरात खोदकामानंतर केबल घालून 24 तासात खड्डा बुजवणे बंधनकारक असताना काही ठिकाणी पंधरा-पंधरा दिवस खोदकाम तसेच ठेवले जाते. तूये आयटीआय परिसरात तूये वीज विभागाच्या उपकेंद्रासमोर मांद्रे या ठिकाणी अजूनही खोदकाम तसेच ठेवले आहे.

मांद्रे आसकावाडा येथे एका दुचाकीस्वार महिलेला जीव गमवावा लागला. त्यानंतर पंचायतीने घटनास्थळी भेट देऊन आठवड्यात रस्ते पुर्ववत न केल्यास रस्त्यावर उतरण्याचा इशारा मांद्रे सरपंच सावंत यांनी दिला होता. अपघाताची ही मालिका सरकारने बंद करण्यासाठी व्यवस्थित रस्ते बुजवण्याचे आदेश कंत्राटदाराला द्यावे अशी मागणी केली जात आहे.

अनेक ठिकाणी दिशादर्शक फलक नाही किंवा धोका देणारी सूचना नाही. तुये आयटीआय परिसरात खोदकामाच्या येथील फलक रात्री दिसत नाही. कंत्राटदाराने खोदकाम केलेल्या ठिकाणी रिफ्लेक्ट टेप लावाव्यात, अशी मागणी केली जात आहे.