I-League Football Tournament धेंपो स्पोर्टस क्लबने रविवारी अंबरनाथ युनायटेड अटलांटा संघावर 2-1 असा चमकदार विजय नोंदवून द्वितीय विभाग आय-लीग फुटबॉल स्पर्धेतील स्थिती सुधारली. सामना एला-जुने गोवे येथील धेंपो फुटबॉल अकादमी मैदानावर झाला.

पूर्वार्धातील एका गोलच्या पिछाडीवरून गोवा प्रोफेशनल लीग विजेत्या धेंपो क्लबने उत्तरार्धात जोरदार मुसंडी मारत स्पर्धेतील दुसऱ्या विजयाची नोंद केली. ॲश्ली कोळी याने 17 व्या मिनिटास केलेल्या गोलमुळे अंबरनाथ युनायटेडने आघाडी प्राप्त केली.

उत्तरार्धात नऊ मिनिटांत दोन गोल नोंदवून वर्चस्व प्रस्थापित केले. शालम पिरीस याने 51 व्या मिनिटास, तर नेसियो फर्नांडिसने 60 व्या मिनिटास नोंदविलेल्या प्रत्येकी एका गोलमुळे धेंपो क्लबने आघाडी घेतली व ती शेवटपर्यंत टिकवली.

धेंपो क्लबचे आता चार सामन्यांतून आठ गुण झाले असून ड गटात अव्वल असलेल्या एआरए एफसी संघाला त्यांनी गाठले आहे. गोलसरासरीत आता गोव्यातील संघ दुसऱ्या क्रमांकावर आहे. अंबरनाथ युनायटेडचा हा स्पर्धेतील पहिलाच पराभव ठरला. त्यामुळे ते पाच गुणांसह तिसऱ्या स्थानी घसरले.