Kanhaiya Kumar: बंडखोर युवकांचे आकर्षण आणि कॉंग्रेस पक्षाची मुलुखमैदान तोफ, कन्हैया कुमार (Kanhaiya Kumar) आजपासून दोन दिवसांच्या गोवा दौऱ्यावर येत आहे. या दौऱ्यात त्यांच्या म्हापसा आणि मडगाव येथे दोन सभा होणार असून उद्या (शुक्रवारी) राजभवनवर नेल्या जाणाऱ्या धडक मोर्चाचेही ते नेतृत्व करणार आहेत.

आज सायंकाळी पाच वाजता कन्हैया कुमार ‘बहुजन संवाद’ कार्यक्रमात ओबीसी, एससी, एसटी समाजातील प्रमुख नेत्यांशी म्हापसा टॅक्सी स्टॅण्ड येथे संवाद साधणार आहेत. शुक्रवार, 7 जानेवारी रोजी सकाळी 11 वाजता मडगावात एमसीसी हॉल येथे कॉंग्रेस पक्षातर्फे (Congress) आयोजित ‘युवा स्पंदन’ कार्यक्रमात सहभागी होऊन विद्यार्थ्यांशी संवाद साधणार आहेत.

उद्या दुपारी 3:30 वाजता कॉंग्रेस पक्षातर्फे आयोजित राजभवनवरील धडक मोर्चाचे नेतृत्वही कन्हैया कुमार करणार आहेत. यावेळी कॉंग्रेसचे ज्येष्ठ निरीक्षक पी. चिदंबरम, गोवा प्रभारी दिनेश गुंडू राव, प्रदेश अध्यक्ष गिरीश चोडणकर, विरोधी पक्षनेते दिगंबर कामत शेकडो कार्यकर्त्यांसह उपस्थित असतील. कॉंग्रेस पक्षातर्फे भाजप (BJP) सरकार विरोधातील आरोपपत्राची एक प्रत राज्यपालांना देण्यात येणार आहे. कन्हैया कुमार यांच्या दौऱ्यामुळे युवा वर्गामध्ये उत्साहाचे वातावरण आहे.