आजरा: अक्कलकोट आणि शिर्डी देवदर्शन करून गोव्यात परतणाऱ्या भाविकांच्या कारचा अपघात होऊन ती पलटी झाल्याची घटना शुक्रवारी (२८ मार्च) आजरा-आंबोली मार्गावरील सुळेरान येथे घडली. या अपघातात एका महिलेचा मृत्यू झाला असून तिघंजण गंभीर जखमी झाले आहेत.

मिळालेल्या माहितीनुसार, म्हापसा येथील भोसले कुटुंब अक्कलकोट आणि शिर्डी देवदर्शन करून गोव्यात परत येत असताना त्यांच्या कारचा सुळेरान येथे अपघात झाला. या अपघातात अंकिता अजित भोसले यांचा मृत्यू झाला. तर अजित हरिश्चंद्र भोसले, आशिष अजित भोसले आणि अंकेश अजित भोसले हे तिघंजण गंभीर जखमी झाले आहेत.

पहाटे चारच्या सुमारास आजरा-आंबोली मार्गावरील सुळेरान येथे हा अपघात घडला. चालकाचा गाडीवरील ताबा सुटल्यानं कार रस्त्याशेजारी असलेल्या जाहिरात फलकाला धडकून पलटी झाली.

जखमींवर उपचार सुरू

भोसले कुटुंबीय बुधवारी दुपारी म्हापसातील आपल्या निवासस्थानाहून शिर्डी व अक्कलकोट देवदर्शनासाठी निघाले होते. गुरुवारी दर्शन करून सायंकाळी सहा वाजता परतीच्या प्रवासाला निघाले.

गोव्याच्या दिशेनं जात असताना आज सकाळच्या सुमारास सुळेरान येथे वळणावर चालकाचा गाडीवरील ताबा सुटल्याने कारनं नियंत्रण गमावलं आणि रस्त्याशेजारी असलेल्या जाहिरात फलकाला धडकल्यानं हा अपघात झाला. जखमींना आजरा ग्रामीण रूग्णालयात दाखल करण्यात आलं असून, पोलीस या घटनेचा पुढील तपास करत आहेत.