Panaji News : उसगावात मुलींच्या मातांचा गौरव पणजी, उसगाव येथे विकसित भारत यात्रेच्या निमित्ताने मातृवंदना योजनेखाली महिलांना सन्मानित करण्यात आले. माता आणि बाल कल्याणासाठी सरकारच्या समर्पणाला बळकटी देण्यासाठी या कार्यक्रमाचे आयोजन करण्यात आले होते.

महिला व बालकल्याणमंत्री विश्वजित राणे यावेळी प्रमुख पाहुणे म्हणून उपस्थित होते. यावेळी मुलींच्या मातांना गौरविण्यात आले.

पंतप्रधान मातृ वंदना योजनेद्वारे बक्षिसे मिळाल्याबद्दल मुलींच्या मातांनी खूप आनंद व्यक्त केला. विकसित भारत संकल्प यात्रा उसगाव येथे पोहोचताच, अंगणवाडी सेविका आणि डॉक्टरांनाही त्यांच्या अमूल्य योगदानाबद्दल गौरवण्यात आले.

त्यांच्या सामुदायिक आरोग्यासाठीच्या दृढ वचनबद्धतेची दखल या पद्धतीने घेण्यात आली. भारताची नारी शक्ती, युवा शक्ती, शेतकरी आणि भारतातील वंचित कुटुंबे या चार अमृत स्तंभांचा विकसित भारत संकल्पनेत समावेश करण्यात आला आहे.