‘म्हादई बचावा’साठी रिव्हॉल्युशनरी गोवन्स पक्षाने सत्तरी तालुक्यातील ठाणे येथून सुरू केलेल्या पदयात्रेवर आज पहिल्याच दिवशी म्हाऊस पंचायतीने आक्षेप नोंदवल्‍याने सायंकाळी ती प्रशासनाने रोखली. तीन तासांनंतर तेथील वादावर पडदा पडला. परंतु, त्‍यानंतर सदर यात्रा कोपार्डे येथे पोहोचली असता, काही जणांच्‍या तक्रारीवरून प्रशासनाने पुन्‍हा अटकाव केला. त्‍यामुळे तणाव निर्माण झाला.

दरम्यान, उपजिल्हाधिकारी यांनी सत्तरीत आजपासून कलम 144 अंतर्गत जमावबंदीचे आदेश लागू केले आहेत.

सत्तरी तालुक्यात पदयात्रा रोखल्यानंतर तणावाचे वातावरण निर्माण झाले होते. त्यानंतर आज तालुक्यात कलम 144 अंतर्गत जमावबंदीचे आदेश लागू केले आहेत. पुढील आदेश येईपर्यंत पदयात्रेच्या सर्व परवानग्या रद्द करण्यात आल्या आहेत.

दरम्यान, सत्तरी तालुक्यात वाळपई, पर्ये मतदारसंघांत मिळून विधानसभा निवडणुकीत ‘आरजी’ने दहा हजार मते घेतली होती. त्यामुळे म्हादईसारखी समस्या निर्माण होते, त्यावेळी त्या लोकांना पाठिंबा देण्याची पक्षाची नैतिक जबाबदारी असते. म्हणूनच ठाणे येथून पदयात्रा सुरू केली होती. पण याला राजकीय वळण देत काहींनी पदयात्रा रोखली. पण आम्ही मागे हटणार नाही. सत्तरी तालुका कुणाच्या बापाचा नाही, असे रोखठोक प्रतिपादन मनोज परब यांनी मंगळवारी केले आहे.

तर, "आम्ही पदयात्रा अडवलेली नाही. तर पंचायतींनी त्या पदयात्रेस विरोध केला आहे. पण माझा एकच सवाल आहे त्यांनी सत्तरीतच का पदयात्रा सुरू केली. त्यांचे स्वतःचे गाव आहे त्यांनी तिथून करायची होती सुरवात. ही राजकीय हेतूने सुरू केलेली पदयात्रा आहे. पदयात्रेत सर्व लोक बाहेरचे. सत्तरीचे लोक त्यात काही नाही. स्थानिक पंचायत बॉडींनी आम्हाला हा त्रास नको असे म्हटले आहे. स्थानिकांनीच या पदयात्रेला विरोध केला आहे." असे आमदार दिव्या राणे म्हणाल्या आहेत.

दरम्यान, ‘आरजी’ची यात्रा 28 फेब्रुवारीपर्यंत 100 किलोमीटर अंतर पार करणार आहे. सोमवारी पदयात्रा ठाणे येथे येताच वाळपई पोलिसांनी आक्षेप घेत रोखली. म्हाऊस सरपंच सोमनाथ काळे यांनी शासनदरबारी आक्षेप घेतल्याने पदयात्रा रोखत पोलिसांचा फौजफाटाही ठाणे येथे दाखल झाला.