म्हापसा : मागील महिन्याभरात म्हापसा शहरात डेंग्यूचे सात रुग्ण आढळून आले आहेत. परिणामी म्हापसा नागरी आरोग्य केंद्र दक्ष झाले आहे. साखळी, फोंडा नंतर म्हापशात रुग्ण आढळून लागल्याने राज्यात डेंग्यूचा फैलाव वाढत असल्याचे चित्र दिसून येत आहेत.

म्हापशाच्या कुचेली, करासवाडा, गावसावाडा, पेडे व शेळपे या भागांत डेंग्यूचे रुग्ण आढळले आहेत. येथील आरोग्य अधिकारी प्रादुर्भाव होऊ नये, यासाठी आवश्यक काळजी घेत आहेत. स्वच्छता उपक्रम राबवणे, घरोघरी जनजागृती करणे, प्रतिबंध करण्यासाठी काय करावे , याविषयी माहिती पत्रकांचे वाटप, असे उपक्रम राबवले जात आहेत.

गेल्या महिनाभराच्या काळात सात रुग्ण सापडले असून त्याला अटकाव करण्यासाठी आम्ही नियमितपणे मोहीम राबवली आहे, असे डॉ. डिसोझा यांनी म्हटले आहे.