वाळपई: खोतोडे - सत्तरी येथील घोलकरवाडा येथील दत्तू सगुण नाईक यांच्या घराच्या पटांगणात ठेवलेल्या दोन दुचाकींची तोडफोड करून सगुण यांच्या पत्नी, मुलांवर हल्ला करण्याची घटना रविवारी 3.30 वाजता घडली आहे. याबाबत दत्तू नाईक यांनी वाळपई पोलिस स्थानकात तक्रार दाखल केली आहे. नाईक यांनी तक्रारीत म्हटले आहे, की काल साडेतीनच्या दरम्यान शेजारी राहणारा संशयित बाळू शांबा घोलकर हा घराजवळ आला. त्यावेळी माझी पत्नी, मुलगा व्हारांड्यात होते. संशयिताच्या हातात कुर्हाड होती.

त्यावेळी बाळू याने हल्ला केला व गलिच्छ शब्दात शिवीगाळ केली. तसेच तुळशी वृंदावनाचे नुकसान केले व एक स्कूटर, एक मोटारसायकल या दुचाकी वाहनांची तोडफोड करून नुकसान केले. व्हरांड्यातील मार्बलच्या बांधकामाचीही तोडफोड करून नुकसान केले.

या घटनेत सुमारे साठ हजारांचे नुकसान झाले आहे. यावेळी तत्काळ शंभर नंबर क्रमांकावर संपर्क करून पोलिसांना पाचारण करण्यात आले. पोलिसांनी संशयिताला ताब्यात घेऊन पुढील कारवाई हाती घेतली आहे.