Arvind Kejriwal Goa Visit: दिल्लीचे मुख्यमंत्री आणि आम आदमी पक्षाचे राष्ट्रीय संयोजक अरविंद केजरीवाल गोव्यात दाखल झाले आहेत. केजरीवाल यांच्यासोबत पंजाबचे मुख्यमंत्री भगवंत मान देखील आहेत.

केजरीवाल आणि मान यांचे रात्री साडे सातच्या सुमारास उत्तर गोव्यातील मोपा विमानतळावर आगमन झाले.

"आमचे गोव्यात दोन आमदार आहेत आणि ते फार चांगले काम करत आहेत. वेंझी व्हिएगश मागील बऱ्याचकाळापासून आम्हाला बोलवत होते, त्यांनी त्यांच्या मतदारसंघात महोल्ला क्लिनिक सुरु केले आहे. त्यांची पाहणी आम्ही उद्या करुन, आमचे उमेदवार आणि कार्यकर्त्यांची भेट घेणार," असल्याची माहिती अरविंद केजरीवाल यांनी विमानतळावर उतरताच दिली.

तसेच, आज आपचे गोवा प्रदेशाध्यक्ष अमित पालेकर यांच्या निवासस्थानी स्नेह भोजन असल्याने तिथे हाजेरी लावणार असल्याचे केजरीवाल म्हणाले. यावेळी त्यांच्यासोबत पंजाबचे मुख्यमंत्री भगवंत मान उपस्थित होते.

अरविंद केजरीवाल आगामी लोकसभा निवडणुकीच्या पार्श्वभूमीवर राज्यातील तयारीचा आढावा घेतील. राज्यातील पक्षाचे आमदार, प्रदेशाध्यक्ष आणि वरीष्ठ नेते यांच्याशी ते चर्चा करतील.

आप इंडिया आघाडीचा भाग आहे पण अद्याप जागा वाटपाबाबत निर्णय झाला नसल्याने गोव्यात पक्षाला जागा मिळणार का प्रश्न उपस्थित केला जात आहे. आम आदमी पक्ष गोव्यात एक जागा लढविण्यास इच्छुक असल्याची माहिती पक्षाच्या सूत्रांनी दिलीय.