मडगाव: सासष्टी तालुक्यात तब्बल आठ मतदारसंघ येतात. त्यातील मडगाव व फातोर्डा वगळले तर अन्य ठिकाणी पक्षनिष्ठेचे तीन तेरा वाजल्याचे दिसून येते.मडगाव व फातोर्डा येथे गतवेळी म्हणजे 2017 मध्ये निवडून आलेले आमदार यावेळीही त्याच पक्षाच्या चिन्हावर निवडणूक लढवीत आहेत. तसेच नावेलीचे लुईजिन फालेरो (Luizinho Faleiro) शर्यतीतून बाहेर पडले आहेत. अन्यत्र मात्र उलथापालथ दिसून येते. (defectors in nuvem and 6 other constituencies)

गत वेळी म्हणजे 2017 मध्ये नुवेतून बाबाशान ऊर्फ विल्फ्रेड डीसा हे कॉंग्रेसच्या उमेदवारीवर तर बाणावलीतून चर्चिल आलेमाव-राष्ट्रवादी काँग्रेस,कुडतरी- आलेक्स रेजिनाल्ड-कॉंग्रेस, कुंकळ्ळी-क्लाफास डायस- कॉंग्रेस, वेळ्ळी- फिलीप नेरी- कॉंग्रेसतर्फे, नावेली- लुईजिन फालेरो यांनी कॉंग्रेसच्या (Goa Congress) उमेदवारीवर निवडणूक लढवली होती.

यावेळी चित्र उलटेपालटे झालेले आहे. यावेळी नुवेतून बाबाशान उर्फ विल्फ्रेड डीसा अपक्ष म्हणून रिंगणात आहेत. गतवेळच्या निवडीनंतर त्यांनी भाजपात प्रवेश केला होता, पण नंतर भाजपचा उमेदवार म्हणून रिंगणात उतरल्यास अल्पसंख्याक अन् कॅथलिक मतदार दुरावतील,या भीतीने ते अपक्ष उमेदवार म्हणून रिंगणात उतरले आहेत. तर भाजपने आपला उमेदवार उभा केला आहे.

कुडतरीत आमदार आलेक्स रेजिनाल्ड हे प्रथमच अपक्ष म्हणून रिंगणात उतरले आहेत. त्यांनी तृणमूल (Goa TMC) मध्ये प्रवेश केला न नंतर बाहेर पडले. पण कॉंग्रेसने उमेदवारी न दिल्याने त्यांच्यावर ही वेळ आली आहे.

कुंकळ्ळीत कॉंग्रेस तिकिटावर निवडून आलेले क्लाफास डायस यावेळी भाजपच्या उमेदवारीवर तर वेळ्ळीत गत वेळी कॉंग्रेस उमेदवारीवर निवडून आलेले व नंतर भाजपात गेलेले फिलीप नेरी मात्र यावेळी तृणमूलचे उमेदवार आहेत. बाणावलीतील चित्रही काहीसे असेच आहेत. गतवेळी राष्ट्रवादीच्या तिकिटावर आमदार झालेले चर्चिल आलेमाव यावेळी तृणमूलचे उमेदवार आहेत. नावेलीतून गतवेळी लुईजिन फालेरो निवडून आले होते पण नंतर ते तृणमूलमध्ये गेले व त्या पक्षाचे राज्यसभा खासदार बनले त्यामुळे ते या निवडणुकीत नाहीत. मडगाव व फातोर्डात मात्र तशी उलथापालथ झालेली नाही. दिगंबर कामत (कॉंग्रेस) व विजय सरदेसाई (गोवा फारवर्ड) हे दोघे यावेळीही त्याच पक्षाच्या उमेदवारीवर रिंगणात आहेत.