Bicholim: यंदा समाधानकारक पाऊस पडूनही डिचोलीतील ‘आमठाणे’ धरणातील जलसाठ्याची पातळी सध्या किंचित घटली असल्याचे चित्र दिसून येत आहे. गुरुवारपर्यंत धरणातील पाण्याची पातळी जवळपास साडेतीन मीटर एवढी कमी झाली आहे.

जानेवारीत धरणाच्या सभोवतालचे पात्र कोरडे पडू लागले असले, तरी काळजी करण्याचे कारण नाही. आवश्यकतेनुसार धरणातील जलसाठा नियंत्रित करण्यात येणार आहे. अशी माहिती जल संसाधन खात्याच्या अधिकाऱ्यांकडून देण्यात आली आहे.

मेणकूरे-धुमासे पंचायत क्षेत्रात येणाऱ्या आमठाणे धरणाचे कार्यक्षेत्र 582 हेक्टर मीटर एवढे आहे. तर पाण्याची पातळी 50 मीटर एवढी आहे. गुरुवारी या धरणातील जलसाठ्याची पातळी 46.5 मीटर एवढी झाली आहे. यंदा मान्सूनला सुरवात होपर्यंत धरणातील जलसाठा समाधानकारक होता. पावसाळ्यातही हे धरण दोनवेळा तुडुंब भरले होते.

गेल्या दोन वर्षांपासून या धरणात मगरीचा संचार आहे. त्यामुळे आंघोळ किंवा मजा लुटण्यासाठी धरणात उतरणे धोक्याचे बनले आहे. तशी धोक्याची सूचनाही जलस्रोत खात्यातर्फे धरण परिसरात लावले आहेत. गेल्या वर्षी 1 जानेवारी रोजी नववर्ष साजरे करण्यासाठी या धरणात उतरलेल्या राजस्थान येथील पर्यटकावर मगरीने हल्ला केला होता. या हल्ल्यात त्या पर्यटकाचा बळी गेला होता.