सासष्टी: पुतळा व मंदिराचा स्तंभ यामध्ये अडीच मीटरची जागा आहे व पालखी परिक्रमेस कोणताही अडथळा येण्याची शक्यताच नाही. अशा परिस्थितीत रुमडामळ-दवर्ली येथील मारुती मंदिराच्या आवारात फेब्रुवारी महिन्यात उभारण्यात आलेला छत्रपती संभाजी महाराजांचा पुतळा हटविण्याचा प्रश्र्नच उद्भवत नाही.

त्याचप्रमाणे हे प्रकरण सध्या जिल्हाधिकाऱ्यांकडे असल्याने जिल्हाधिकारी यासंदर्भात जो निर्णय घेतील, तो आम्ही मान्य करू, असे ‘संभाजी’प्रेमींतर्फे आज घेतलेल्या पत्रकार परिषदेत विनायक वळवईकर यांनी सांगितले.

पुतळ्यासाठी सुरक्षित जागा!

हा पुतळा इथेच का, याबद्दल बोलताना विनायक वळवईकर यांनी सांगितले की, ही जागा मारुती मंदिर ट्रस्टची असल्याचे ट्रस्टचे पदाधिकारी सांगतात. सध्या रुमडामळ परिसरात बेकायदेशीर कामांना ऊत आला आहे. त्यामुळे संभाजी महाराजांच्या पुतळ्यासाठी ही जागा आम्हाला सुरक्षित वाटली.

जर हा पुतळा बेकायदेशीर आहे तर मग मारुती मंदिर ट्रस्टच्या सभागृहाखाली पार्किंगच्या जागेऐवजी आणखी एक सभागृह करण्यात आले आहे. ते बेकायदेशीर नाही का? जे पहिल्या मजल्यावर सभागृह आहे त्याला मारुती मंदिर ट्रस्टचे सभागृह असे नाव द्यायचे सोडून बाबू नायक सभागृह असे का दिले, असा प्रश्र्नही वळवईकर यांनी केला.