गोवा: दक्षिण गोव्यातील पैंगीण येथील दत्तानुभव (राघव) गुलाब टेंग्से यांनी वेदांत शास्त्रामध्ये संपूर्ण अद्वैतवेदांत शास्त्राची महापरीक्षा देऊन रविवारी (दि.२७) रोजी 'अद्वैतवेदान्त रत्न' ही उपाधी कांची शंकराचार्यांकडून प्राप्त केली.

राघव टेंग्से यांनी रिवण,गोवा येथील श्रीविद्या पाठशाळेत पं. देवदत्त पाटील व पं. राजेश्वरशास्त्री देशमुख यांच्याकडे न्यायशास्त्राचे अध्ययन पूर्ण केले असून चेन्नई येथून महामहोपाध्याय पं. मणिद्राविड गुरुजींकडून वेदांत शास्त्राचे अध्ययन पूर्ण केले आहे.

भारतात सहा दर्शनशास्त्रांमधून ही परीक्षा घेतली जाते. आधी शास्त्रपोषक सभा या नावाने घेतली जाणारी हीच परीक्षा आता कांची वेदवेदांत शास्त्रसभा या नावाने सुरु आहे. सहा वर्षांच्या अभ्यासक्रमाला अनुसरून भारतात विविध ठिकाणी याचे अध्ययन सुरु आहे. सहा वर्षांच्या अध्ययनानंतर टप्याटप्याने काही परीक्षा घेतल्या जातात आणि शेवटी महापरीक्षेनंतर शास्त्रानुसार पदवी प्रदान केली जाते.

दत्तानुभव टेंग्से यांनी दुसऱ्या टप्प्याची परीक्षा उत्तीर्ण केली असल्याने त्यांना 'अद्वैतवेदान्त रत्न' ही उपाधी बहाल करण्यात आलीये. शास्त्राचे अधिकाधिक अध्ययन करण्यासाठी अशा पदव्यांची मदत मिळते असे दत्तानुभव टेंग्से म्हणाले.

परीक्षा उत्तीर्ण झाल्यानंतर गोव्यात वेदांत शास्त्रातील अद्वैतवेदान्त रत्न ही पदवी मिळवणारे दत्तानुभव टेंग्से हे पहिले शास्त्राचे अभ्यासक ठरले आहेत. वर्ष २०१८ पासून त्यांची या परीक्षेसाठी तयारी सुरु होती, मात्र मध्ये आलेल्या कोरोना महामारीमुळे काहीकाळ उशीर झाला अशी माहिती दत्तानुभव टेंग्से यांनी दिली.