मुसळधार पावसामुळे तालुक्यात बागायती व भातशेतीची नुकसान झाले आहे. सर्वाधिक नुकसानी गावडोंगरी व खोतीगावात झाली आहे.

गावडोंगरीत तळपण नदीच्या जोड नाल्यांना पूर येऊन किनाऱ्याजवळील बागायतीत पाणी घुसून केळी, सुपारीची झाडे वाहून गेली. गावडोंगरी पंचायत क्षेत्रातील भूपर, फुलांमळ, भार्स व अन्य भागात शेतकऱ्यांना फटका बसला.

भूपर येथील दीपू फळदेसाई यांच्या बागायतीजवळील नदी किनाऱ्याची सुमारे ३० मीटर संरक्षक भिंत पाण्याच्या जोरदार प्रवाहामुळे वाहून गेली. तसेच पेरणी केलेली शेती तसेच तरवा वाहून गेला आहे. कृषी अधिकारी सर्वानंद सर्वणकर यांनी या भागाची पाहणी करून नुकसानीचा आढावा घेतला.