वास्को : दाबोळी येथे निवासी भूखंड देण्याचे आमिष दाखवून ५३ लाख रुपयांची फसवणूक केल्याप्रकरणी भोपाळ (मध्यप्रदेश) येथील कमल सिंग कौरव याच्याविरोधात वास्को पोलिस ठाण्यात गुन्हा दाखल करण्यात आला आहे. या प्रकरणामुळे भूखंड खरेदी व्यवहारांबाबत सावधगिरी बाळगण्याची गरज पुन्हा अधोरेखित झाली आहे.
पोलिसांनी दिलेल्या माहितीनुसार, कमल सिंग कौरव याने आपण दाबोळी येथील निवासी भूखंडाचा मालक व अधिकृत विक्रेता असल्याचे भासवले. त्याने संबंधित तक्रारदाराला आकर्षक दरात भूखंड देण्याचे आश्वासन दिले. ऑगस्ट २०२२ पासून आजतागायत टप्प्याटप्प्याने एकूण ५३ लाख रुपये त्याने स्वीकारले. यामध्ये ४६ लाख रुपये बँकेमार्फत तर ७ लाख रुपये रोख स्वरूपात देण्यात आले.
मात्र संपूर्ण रक्कम दिल्यानंतरही आरोपीने भूखंडाच्या कागदपत्रांची पूर्तता न करता वेळकाढूपणा सुरू ठेवला. वारंवार पाठपुरावा करूनही व्यवहार पूर्ण होत नसल्याने तक्रारदाराला संशय आला. चौकशीअंती आपली फसवणूक झाल्याचे लक्षात येताच त्यांनी वास्को पोलिस ठाण्यात धाव घेत तक्रार दाखल केली.
या प्रकरणी पोलिस उपनिरीक्षक प्लेटो कार्व्हालो पुढील तपास करीत आहेत. दरम्यान, कोणताही भूखंड किंवा मालमत्ता खरेदी करण्यापूर्वी मालकी हक्काची कागदपत्रे, परवानग्या व व्यवहाराची कायदेशीर पडताळणी करूनच व्यवहार करावा, असे आवाहन पोलिसांकडून करण्यात आले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.