वास्को: जोपर्यंत मी आहे, तोपर्यंत दाबोळी विमानतळ बंद होईल याचा कोणी स्वप्नातही विचार करू नये. येणाऱ्या काळात दाबोळी विमानतळावर आणखी दोन एअर ब्रिजची सुविधा होणार आहे. तसेच सुमारे २५० कोटी खर्च करून दाबोळी विमानतळ एक मॉडर्न विमानतळ करण्याचा आमचा प्रयत्न असल्याचे पंचायतमंत्री मावीन गुदिन्हो यांनी येथे गुरुवारी सांगितले.

दाबोळी विमानतळावरील युनायटेड टॅक्सीमेन असोसिएशनाच्या नूतन कार्यकारिणीने मंत्री गुदिन्हो यांची नवे वाडे येथील कार्यालयात भेट घेतली. याप्रसंगी असोसिएशनच्या पदाधिकारी व सदस्यांनी मंत्री गुदिन्हो यांनी दाबोळी विमानतळ बंद होऊ नये यासाठी केलेल्या प्रयत्नाबद्दल आभार मानले.

असोसिएशनच्या पदाधिकाऱ्यांनी समस्यांसंबंधी चर्चा केली. गुदिन्हो यांनी दाबोळी विमानतळ बंद होणार नसल्याची ग्वाही दिली. या विमानतळासंबंधी कायमस्वरूपी तोडगा काढण्याचा आमचा विचार आहे. त्यासाठी सरक्षण मंत्री व नागरी विमान वाहतूक मंत्री यांच्या भेटी घेऊन पाठपुरावा करणार आहे.

त्यांनी आम्हाला काही मार्ग दाखविला आहे, त्यामुळे तुम्ही कोणतीही काळजी करू नका, असे आवाहन त्यांनी केले. येणाऱ्या काळात आम्ही दाबोळी विमानतळाचे रूप पालटणार आहोत. असे ते म्हणाले.