Dabolim Airport Mig-29 tyre burst: दक्षिण गोव्यातील दाबोळी विमानतळावर आज, मंगळवारी दुपारी मिग-29 या लढाऊ विमानाचा टायर फुटल्याची घटना घडली. सुदैवाने या घटनेत कुणीही जखमी झालेले नाही.

दरम्यान, या घटनेनंतर येथील काही फ्लाईट्स मोपा येथील मनोहर आंतरराष्ट्रीय विमानतळावर डायव्हर्ट करण्यात आल्या आहेत. तसेच अनेक कमर्शिअल फ्लाईट्सनाही याचा फटका बसला आहे.

तथापि, टायर फुटल्याने येथे आग लागली होती. पण त्या आगीवर तत्काळ विमानतळ प्रशासनाने नियंत्रण आणले. दरम्यान, या प्रकारानंतर दाबोळी विमानतळावरील धावपट्टी दुपारी 3.30 पर्यंत लँडिंगसाठी बंद करण्यात आली आहे. विमानतळ संचालक धनंजय राव यांनी ही माहिती दिली.

दरम्यान, विमानतळाची धावपट्टी लँडिंगसाठी बंद असल्याने या विमानतळावर नियोजित असलेल्या दोन फ्लाईट्स इतरत्र वळवण्यात आल्या. दरम्यान, मिग फायटर जेटचा टायर नेमका कशामुळे फुटला, याचा शोध घेतला जात आहे.

भारतीय नौदलाच्या प्रवक्त्याने सांगितले की, 'विमान नियमित उड्डाण करण्यापूर्वी टॅक्सीवेवर असताना त्याचा टायर फुटला. अग्निशमन दल आणि इतर सेवेचे जवान तातडीने तेथे पाठवण्यात आले. सिंगल पायलट विमान टॅक्सीवेपासून दूर नेले जाईल. दाबोळी विमानतळ हे INS हंस नौदल तळाचा भाग आहे. या सुविधेचा उपयोग नौदलाच्या विमानांद्वारे दिवसाच्या ठराविक वेळेत केला जातो.

या घटनेमुळे विमानतळाची धावपट्टी काही काळ बंद ठेवण्यात आली होते. तसेच यामुळे 10 विमानांच्या सेवेवर परिणाम झाला. काही उड्डाणे मोपा येथील मनोहर आंतरराष्ट्रीय विमानतळाकडे वळवण्यात आली.