Siolim Cylinder Blast

म्हापसा: शिवोलीत सिलिंडरचा स्फोट होऊन दाम्पत्य जखमी झाले आहे. जखमी झालेल्या दाम्पत्यावर गोवा वैद्यकीय महाविद्यालयाच्या रुग्णालयात उपचार सुरु आहेत. सडये येथील भाड्याच्या खोलीत सोमवारी (०९ डिसेंबर) हा स्फोट झाला.

राम दुलारी (31) आणि सुमन दुलारी (29) असे या स्फोटात जखमी झालेल्या दाम्पत्याचे नाव आहे. तीन माड, सडये - शिवोली येथील एका भाड्याच्या खोलीत दोघे राहत होते. सोमवारी रात्री आठच्या सुमारास सिलिंडरचा स्फोट झाल्याने दुर्घटना घडली. पोलिसांनी घटनास्थळी दाखल होत घटनेचा पंचनामा केला.

पोलिसांनी दिलेल्या माहितीनुसार, दुलारी दाम्पत्याच्या घरात पाच लिटर क्षमतेचा छोटा सिलिंडर होता. दरम्यान, सिलिंडरचा अचानक स्फोट झाला. यात दोघे गंभीर जखमी झाले. जखमी दोघांना सुरुवातीला उत्तर गोवा जिल्हा रुग्णालयात दाखल करण्यात आले.

सध्या त्यांच्यावर गोवा वैद्यकीय महाविद्यालयाच्या रुग्णालयात उपचार सुरु आहेत. गॅस लीक झाल्याने स्फोट झाल्याची शंका व्यक्त केली जात आहे. पोलिस अधिक तपास करत आहे.