डिचोली : शहरातील न्यायालय इमारत परिसरात रहदारीच्या ठिकाणी धोकादायक अवस्थेत उभा असलेलं आंब्याचं झाड अखेर तोडण्यात आलं आहे. न्यायालयाच्या आदेशानुसार सार्वजनिक बांधकाम खात्यातर्फे हे झाड तोडण्यात आले आहे. झाड तोडल्याने नागरिकांसह पालकांनीही सुटकेचा नि:श्वास सोडला आहे.

मुख्य रस्ता आणि न्यायालयाकडून (Court) बाजाराच्या दिशेने जाणाऱ्या रस्त्याच्या कोपऱ्यावर न्यायालयाच्या कुंपणात उभे असलेले आंब्याचे झाड पूर्णपणे वाळलेले आणि अत्यंत कमकुवत बनले होते. हे झाड कोणत्याही क्षणी कोसळण्याची भीती व्यक्त होत होती. ज्याठिकाणी हे धोकादायक झाड उभे होते, तो परिसर सदैव रहदारीने (Traffic) गजबजलेला असतो.

सकाळी आणि दुपारी विद्यार्थी आणि पालकांची वर्दळ असते. रहदारीच्यावेळी जर हे झाड कोसळले, तर मोठा अनर्थ घडण्याची शक्यता नाकारता येत नव्हती. अशी भीती बाजारातील दुकानदार आणि अन्य नागरिक व्यक्त करीत होते. पालिका किंवा संबंधित यंत्रणेने संभाव्य धोका ओळखून हे झाड त्वरित कापावे, अशी मागणी डिचोलीतील (Bicholim) नागरिकांसह पालक खूप दिवसांपासून करत होते.