मडगाव: कुडचडे वासनाकांड प्रकरणातील संशयित सोहम नाईक प्रकरण हाताळताना पुरेशी खबरदारी न घेतल्याने भर कोर्टात ‘सोहमला अटक करण्याची गरज नाही’, अशी लज्जास्पद कबुली द्यावी लागलेले क्राईम ब्रँच पोलिस पुन्हा एकदा अडचणीत येण्याची शक्यता आहे.

कुठल्याही संशयिताला अटक करताना त्याला त्याने केलेल्या गुन्ह्याची माहिती लेखी स्वरूपात देणे बंधनकारक असतानाही या प्रकरणात तपास करणाऱ्या क्राईम ब्रँच पोलिसांनी ही खबरदारी घेतली नसल्याचे आता पुन्हा एकदा कोर्टातच उघड झाले आहे. एका अल्पवयीन मुलीवर लैंगिक अत्याचार केल्याच्या आरोपाखाली अटक केलेल्या सोहमने बाल न्यायिक मंडळासमोर जामिनासाठी अर्ज केला असून आज या अर्जाची सुनावणी न्यायिक मंडळाच्या अध्यक्ष न्या. सुनीता गावणेकर यांच्यासमोर आली असता, ही बाब उघड झाली.

या जामीन अर्जावरील दोन्ही बाजू ऐकून घेतल्यावर न्या. गावणेकर यांनी १९ मेपर्यंत ही सुनावणी तहकूब केली. आतापर्यंत सोहम नाईक याच्या विरोधात एकूण पाच गुन्हे नोंद झाले असून त्यातील सध्याच्या प्रकरणातील गुन्हा सोहमने तो अल्पवयीन असताना केल्यामुळे या प्रकरणाची सुनावणी बाल न्यायिक मंडळासमोर सुरू राहणार आहे.

अन् तपास अधिकारी निरूत्तर

सोहमचे वकील अमेय प्रभुदेसाई यांनी दावा केला, की माझ्या अशिलाला अटक करण्यापूर्वी त्याच्या विरोधात नेमके काय गुन्हे आहेत, याचा तपशील लेखी स्वरूपात दिला नाही. त्यामुळे ही अटक बेकायदेशीर आहे. यावर तपास अधिकाऱ्यांकडून न्यायालयाने खुलासा मागितला असता, पोलिस उपनिरीक्षक देईकर यांनी आम्ही सोहमला अटक केली नव्हती, तर त्याला ताब्यात घेतले होते, असे सांगितले. तसे असल्यास त्याला न्यायालयीन कोठडीतून पोलिस कोठडीत घेताना ट्रान्स्फर वॉरंट का घेतले, असा सवाल केला असता तपास अधिकारी निरूत्तर झाले.