मडगाव: कुडचडे येथील एका युवतीवर बोगमाळो-वास्‍को येथे नेऊन बलात्‍कार करण्‍याचा आरोप असलेल्‍या कुडचडेच्‍या हायड्रा फिटनेस या आस्‍थापनाचा मालक सरवर खान याच्‍याविराेधात वास्‍को पाेलिसांनी बलात्‍काराच्‍या आरोपाव्‍यतिरिक्‍त अपहरण आणि विनयभंगाचाही गुन्‍हा नोंद केला आहे. आपल्‍याला अटक होईल या भीतीने तो फरार झाल्‍याचा दावा वास्‍को पोलिसांनी केला आहे.

या प्रकरणात अटक होईल या भीतीने संशयिताने अटकपूर्व जामिनासाठी अर्ज केला असून उद्या शुक्रवारी या अर्जावर सुनावणी होणार आहे. दरम्‍यान, दक्षिण गोव्‍याच्‍या प्रधान सत्र न्‍यायाधीश शेरीन पॉल यांनी संशयिताला एक दिवसाचा अंतरिम जामीन मंजूर करताना उद्यापर्यंत त्‍याला अटक करू नये, अशा सूचना पाेलिसांना केल्‍या आहेत.

सुरुवातीला त्‍या युवतीने कुडचडे पोलिांतस तक्रार दिली होती.संशयित खान याने अटकपूर्व जामिनासाठी अर्ज करताना आपल्‍यावर खोटा आरोप करून आपल्‍याला या प्रकरणात गुंतविण्‍यात आले आहे, असा दावा केला होता.

मात्र, परिस्‍थितीजन्‍य पुरावे पाहिल्‍यास हा दावा खोटा असून संशयिताला जामीनमुक्‍त केल्‍यास तो अन्‍य साक्षीदारांवर दबाव आणू शकतो, असे पोलिसांनी आपल्‍या निवेदनात म्‍हटले आहे.