मोरजी : समुद्रकिनाऱ्यांवर बेकायदेशीरपणे सीआरझेड कायद्याचे उल्लंघन करून बांधकामे केली जातात. हरमल समुद्रकिनारी भागात अशाप्रकारच्या बांधकामांवर कारवाई करण्यास सुरुवात केली आहे. एकूण २१६ बांधकामांपैकी नऊ बांधकामे यावेळी मोडली गेली.

हरमल येथे गिरकरवाडा परिसरातील बेकायदेशीर बांधकामांविषयीचे प्रकरण मागच्या वर्षी न्यायालयात पोहोचले होते. त्यावेळी बर्नार्ड फर्नांडिस हे सरपंच होते. या बेकायदेशीर बांधकामांविषयी उच्च न्यायालयानेही गंभीर दखल घेत सरपंचांच्या नातेवाईकासहित इतर कोणकोणती बांधकामे बेकायदेशीरपणे उभारली गेली त्या सर्व बांधकामांवर कारवाई करण्याचे आदेश दिले होते.

त्यानुसार एकूण २१६ बांधकामांवर कारवाई करण्याचे आदेश प्राप्त झाले होते. त्यानुसार सध्या पेडणे मामलेदार, पेडणे गट विकास कार्यालयामार्फत ही बांधकडो पाडण्याचे काम सुरू झाले आहे.

'त्यांच्या'वर कारवाई कधी?

हरमल, केरी, तेरेखोल, मांद्रे, मोरजी या किनारी भागात मोठ्या प्रमाणात बिगर गोमंतकीयांनी भाडेपट्टीवर जमिनी घेऊन स्थानिक पंचायती किंवा सीआरझेड विभागाचा परवाना नसताना मोठमोठी बांधकामे केली आहेत.

गेल्यावर्षी न्यायालयाने 'सुमोटो' याचिका दाखल करून काही बांधकामे मोडण्याचे आदेश दिले होते. त्यातील हरमल परिसरातील काही बांधकामे मोडली. परंतु बिगर गोमंतकीयांनी केलेली बांधकामे त्याच ठिकाणी आहेत. त्यावर कारवाई कोण करणार, असा प्रश्न नागरिक उपस्थित करत आहेत.