वास्को - बायणा येथील मुरगाव पत्तन प्राधिकरणाचा (एमपीए) मैदानावरील क्रीडा अकादमीत वास्तव्य करून राहत असलेल्या केंद्रीय औद्योगिक सुरक्षा दलाच्या जवानांना(सीआयएसएफ) तेथून अन्यत्र स्थलांतरीत करावे. यासाठी आपण ‘एमपीए’ विरोधात गोवा खंडपीठात दाखल केलेल्या जनहित याचिकेवर उच्च न्यायालयाने सुनवणीस मंजुरी दिली आहे, अशी माहिती सामाजिक कार्यकर्ते नझीर खान यांनी दिली.

दरम्यान, एमपीए मैदान गोवा किक्रेट संघटनेला भाडेपट्टीवर दिल्यास सामान्य क्रीडापटूंसाठीही उपलब्ध करावे, अशी मागणी मुरगाव तालुक्यातील क्रीडाप्रेमींनी केली आहे.

मुरगावचे आमदार संकल्प आमोणकर यांनी एमपीए मैदान गोवा किक्रेट संघटनेला भाडेपट्टीवर देण्यासाठी पुढाकार घेतला आहे. मात्र, एमपीएचे मैदान गोवा किक्रेट संघटनेला दिल्यास ते सर्वसामान्य क्रीडापटूंसाठी उपलब्ध होईल का, याचा खुलासा आमदारांनी करावा.

आमोणकर यांनी मैदानासाठी घेतलेल्या पुढाकाराचे स्वागतच करतो, पण त्यांनी ‘एमपीए’शी मैदानासाठी 'सामंजस्य करार' करावा, असे आवाहन नझीर खान यांनी केले आहे.

‘साग’ने मैदान ताब्यात घ्यावे !

एमपीए मैदान गोवा क्रिक्रेट संघटनेला भाडेपट्टीवर दिल्यास हे मैदान सामान्य क्रीडाप्रेमीना कायमस्वरूपी बंद होईल. त्यामुळे गोवा क्रीडा प्राधिकरण( ‘साग’)ने पुढाकार घेऊन हे मैदान ताब्यात घ्यावे, अशी मागणी सामाजिक कार्यकर्ते सुरेश नाईक यांनी केली आहे.

जनतेच्या हितासाठी लढणाऱ्या आमदारांनी सर्वप्रथम एमपीएशी सामंजस्य करार करावा. नंतरच गोवा किक्रेट संघटनेच्या बाजूने बोलावे, असे आवाहन जयेश शेटगांवकर यांनी केले.