काणकोण: कारवार ते मडगांव हमरस्त्याच्या बाबरे खाडीवरील जुना पूल पाडून नवीन पूल बांधण्यात येत आहे. तर अर्धफोंड येथील तळपण नदीवरील पुलाची दुरूस्ती चालू आहे. मात्र, या कारणांमुळे हा मार्ग प्रवासी बसगाड्या व अवजड वाहनांसाठी बंद करण्यात आला आहे.

कारवार ते मडगाव व परत या मार्गावरील सर्व प्रवासी बस गाड्या माशे ते चाररस्ता मनोहर पर्रीकर बगल मार्गाने वळविण्यात आल्याने माशे ते खालवडे पर्यंतच्या प्रवाशांचे हाल झाले.गेल्या आठवड्यापासून अनिश्‍चित काळासाठी या प्रवासी बसेस या मार्गाने वळविण्यात आल्या आहेत. बाबरे खाडीवर माशे येथे जुन्या साकवाच्या जागी दोन कमानीच्या पुलाची उभारणी करण्यात येत आहे. तसेच अर्धफोंड येथे तळपण नदीवरील पुलाच्या दुरूस्तीचे काम सुरू झाले आहे.

बस नसल्याने विद्यार्थ्यांची गैरसोय

कदंब महामंडळाने प्रवाशांची गैरसोय टाळण्यासाठी या मार्गावर मिनी बस सेवा सुरू करावी, अशी मागणी होत आहे. प्रवासी बसेस बंद असल्याने नोकरदारांबरोबरच महाविद्यालयीन विद्यार्थ्याची गैरसोय झाली आहे. त्यामुळे विद्यार्थ्यांना दररोज दुचाकीवरून महाविद्यालयात सोडण्याची वेळ पालकांवर आली असल्याचे पैंगीण येथील एक पालक आशुतोष कामत यांनी सांगितले.

पैंगीण, श्रीस्थळ भागातील प्रवाशांचे अतोनात हाल

पुलावरून एकेरी वाहतूक सुरू आहे, त्यामुळे प्रवासी गाड्या बगल मार्गावरून वळविण्यात आल्या आहेत. मात्र, या भागातील प्रवाशांची सोय करण्यात आली नाही. पूर्वी अंतर्गत भागातून खासगी मिनी बसेस प्रवासी वाहतूक करीत होत्या, मात्र कोविड काळापासून त्या बंदच आहेत. त्यामुळे समस्येत आणखी भर पडली आहे. पैगीण पंचायत क्षेत्र, व श्रीस्थळ पंचायत क्षेत्रातील नियमीत कामधंद्यानिमित्त जाणाऱ्या लोकांना स्वतःचे वाहन चावडीवर ठेवून नंतर बस गाठून पुढचा प्रवास करावा लागत आहे.