Lok Sabha Election 2024: जगात आदर्श ठरलेली भारतीय लोकशाही नष्ट करण्याचा डाव भाजपने घातला आहे. या पक्षाला मतदानाद्वारे आधी बाहेर फेका आणि भारतीयांच्या कल्याणासाठी युवा, नारी, श्रमिक तसेच शेतकऱ्यांच्या उत्कर्षासाठी काँग्रेसला निवडून आणा, असे आवाहन काँग्रेस पक्षाच्या अखिल भारतीय महिला अध्यक्ष अलका लांबा यांनी केले.

गोव्यातील भ्रष्टाचाराची आणि भ्रष्ट मुख्यमंत्र्यांची आधी चौकशी करा, अशी मागणीही लांबा यांनी केली. फोंड्यातील बसस्थानकावर मंगळवारी काँग्रेस पक्षाचे दक्षिण गोवा उमेदवार कॅप्टन विरियातो फर्नांडिस यांच्या जाहीर प्रचार सभेत लांबा बोलत होत्या. यावेळी उमेदवार विरियातो फर्नांडिस, गोवा फॉरवॉर्डचे अध्यक्ष तथा आमदार विजय सरदेसाई, दुर्गादास कामत, फोंडा काँग्रेसचे नेते राजेश वेरेकर, गिरीश चोडणकर, माजी आमदार लवू मामलेदार, प्रतिमा कुतिन्हो, राम कुंकळयेकर, एन. शिवदास तसेच इतर काँग्रेसचे नेते उपस्थित होते.

उमेदवार विरियातो फर्मांडिस यांनी यावेळी निकराची झुंज असून लोकशाही शाबूत ठेवण्यासाठी काँग्रेस शिवाय पर्याय नाही. देशाच्या उत्कर्षासाठी आणि देशवासीयांच्या हितासाठी काँग्रेस सत्तेवर येणे आवश्यक असल्याचे विरियातो फर्नाडिस म्हणले. इतर मान्यवरांनीही यावेळी काँग्रेसशिवाय पर्याय नसल्याचे सांगून हातालाच मतदान करा असे आवाहन केले. सूत्रसंचालन ॲड. सुरेल तिळवे यांनी केले. राजेश वेरेकर यांनी स्वागत केले.

महागाई, बेरोजगारीमुळे सर्वसामान्य हैराण

अलका लांबा म्हणाल्या की, भाजपने देशाच्या लोकशाहीवरच घाव घातला आहे. महागाई, बेरोजगारीमुळे सर्वसामान्य हैराण झाला आहे. विकासाच्या मोठमोठ्या गोष्टी करणाऱ्या भाजप सरकारला स्मार्ट सिटी अस्तित्वात आणता आलेली नाही. एक किलो मिटर रस्त्यासाठी २५ कोटी रुपये खर्च करणाऱ्या भ्रष्टाचाराची चौकशी व्हायला हवी असे सांगून काँग्रेस सत्तेवर आल्यानंतर कृषी क्षेत्रावर लादलेला जीएसटी आधी रद्द करण्यात येईल असे लांबा म्हणाल्या.

लोकशाही धोक्यात : सरदेसाई

आमदार विजय सरदेसाई म्हणाले की देशाची लोकशाही धोक्यात आली आहे. कदाचित ही निवडणूक शेवटची ठरण्याची भीती असून देश वाचवण्यासाठी यावेळी काँग्रेसलाच निवडून आणा असे आवाहन केले.