पणजी : गेले पंधरा दिवस सतत वाढणाऱ्या इंधन दरवाढीने सामान्य नागरिक त्रस्त झालेत. ही इंधन दरवाढ आणखी काही दिवस अशीच वाढेल असे संकेत पेट्रोलियम क्षेत्रातील तज्ज्ञांनी दिले आहेत. महागाईवरून जनता होरपळत असताना आता राज्यात इंधन दरवाढीवरून राजकीय भडका उडाला आहे.

सार्वजनिक बांधकाम खात्याचे मंत्री निलेश काब्राल (Nilesh Cabral) यांनी दरवाढीवर प्रतिक्रिया देताना पेट्रोलऐवजी इलेक्ट्रिक वाहन वापरा असा सल्ला दिला. यावरून विरोधक आक्रमक झालेत. अशा प्रकारची विधाने सत्तेच्या अहंकारातून येतात अशी टीका काँग्रेस प्रदेशाध्यक्ष अमित पाटकर यांनी केली. तर काब्राल यांचे वक्तव्य बेजबाबदार, असंवेदनशील, अपरिपक्व असून त्यांचे मानसिक संतुलन ढासळल्याची प्रतिक्रिया काँग्रेस (Congress) प्रवक्ते अमरनाथ पणजीकर यांनी दिली.

दरवाढीमुळे कुटुंबियांचे बजेट बिघडले आहे, अशा जखमांवर ते मीठ चोळत आहेत. किमतींवर नियंत्रण ठेवण्याचे प्राथमिक कर्तव्य भाजप (BJP) सरकारने सोडलेले दिसते. हे म्हणजे ‘जर तुम्हाला ब्रेड परवडत नसेल तर केक खा’ असे भाजपचे मंत्री गोवावासीयांना सांगत आहेत. ही वृत्ती सत्तेच्या अहंकारातून निर्माण झाल्याची टीका काँग्रेस प्रदेशाध्यक्ष अमित पाटकर यांनी व्यक्त केली.