पणजी : गोवा सरकारने पंचायत निवडणूक 30 दिवसांनी पुढे ढकलावी अशी विनंती करणारा अर्ज मुंबई उच्च न्यायालयाच्या गोवा खंडपीठात सादर केला होता. तो आज गुरुवारी खंडपीठाने फेटाळला आहे. त्यामुळे गोवा सरकारला मुंबई उच्च न्यायालयाने दिलेल्या आदेशानुसार येत्या 12 ऑगस्टपर्यंत पंचायत निवडणुकीची प्रक्रिया पूर्ण करावी लागणार आहे. या पार्श्वभूमीवर काँग्रेस आमदार युरी आलेमाव यांनी गोवा सरकारवर हल्लाबोल केला.

आलेमाव पुढे बोलताना म्हणाले की, आता बस्स झाले. भाजप सरकारच्या बेजबाबदारपणाने आणि नाकर्तेपणाने न्यायालयीन लढाईंवर सरकारी तिजोरीतून लाखोंचा चुराडा झाला आहे. आता पुन्हा एकदा उच्च न्यायालयाने पंचायत निवडणूका पुढे ढकलण्याची सरकारची याचिका फेटाळली. भाजपने ओबिसींना परत एकदा डावलले आहे. अशी प्रतिक्रीया काँग्रेसचे कार्याध्यक्ष व आमदार युरी आलेमाव यांनी उच्च न्यायालयाने आज पंचायत निवडणुकांची मुदत ३० दिवसांनी वाढविण्याची सरकारची याचिका फेटाळल्यानंतर दिली.

भाजप सरकारने आरक्षणासाठी लागणारी ओबिसींची माहिती जाणीवपुर्वक वेळेत गोळा केली नाही. बहुजन समाजाला त्यांच्या लोकशाही हक्कांपासुन वंचित ठेवण्याच्या भाजपच्या धोरणांचीच ही कृती होती. गोव्यातील जनता भाजपच्या ह्या पापाला कदापी माफ करणार नाही. आणि आगामी निवडणुकीत भाजपभक्त उमेदवारांना योग्य धडा शिकवतील असे ही ते यावेळी म्हणाले.