Assagao land grabbing Case

पणजी: आसगाव येथील सर्वे क्रमांक २३७/७ व २०६/१३ मधील ३,३९५ चौ. मी. जमिनीचे बोगस दस्तावेज तयार करून जमीन हडप केल्याप्रकरणी विशेष तपास पथकाने प्रदेश काँग्रेस समाज माध्यम अध्यक्ष दिव्यकुमार प्रतापराय खंडार (४४, प्रियोळ) व योगेश देविदास मांगर (४१, म्हार्दोळ) या दोघांना अटक केली आहे. न्यायालयाने त्यांना ५ दिवसांची पोलिस कोठडी दिली आहे.

पोलिस अधीक्षक राहुल गुप्ता यांनी दिलेल्या माहितीनुसार, हणजूण येथील फेलिक्स नोरोन्हा यांनी २०२२ साली जमीन हडपप्रकरणाची तक्रार म्हापसा पोलिसात दिली होती. या प्रकरणाचा तपास सुरू असताना गोव्यात अनेक प्रकरणे उघडकीस आली होती. त्यामुळे सरकारने एसआयटी स्थापन करून ही सर्व प्रकरणे वर्ग केली होती. एसआयटीने तपास केला असता संशयितांनी जमिनीचा बनावट दस्तावेज तयार करून भूखंड विकल्याचे उघड झाले.

आणखी दहा जणांविरुद्ध गुन्हे नोंद

एसआयटीने या प्रकरणी भावेश विश्वनाथ सिरसाट, वोमय कुमार एच., सुदिन दत्ताराम नावेलकर, श्रृती सुदिन नावेलकर, लक्ष्मी दत्ताराम नावेलकर, सुशांत दत्ताराम नावेलकर, शुब्रा सुशांत नावेलकर, समीर दत्ताराम नावेलकर, ॲड. मॅटलॉक डिसोझा, ॲड. सुशांत धाऊसकर व इतरांविरुद्ध गुन्हा नोंदविला होता.