पणजी : गोव्यात भाजपने सत्तास्थापनेचा दावा केल्यानंतर आता शपथविधीची तयारी सुरु झाली आहे. 28 मार्चला सकाळी 11 वाजता डॉ. प्रमोद सावंत गोव्याचे मुख्यमंत्री म्हणून पद आणि गोपनीयतेची शपथ घेतील. दुसरीकडे विरोधकांनीही आपल्या विरोधाची धार वाढवण्यासाठी कंबर कसली आहे. काँग्रेस आणि आप एकत्र विरोधी बाकावर बसणार असल्याने सत्ताधारी भाजपसमोर आता तगडं आव्हान उभं ठाकलं आहे.

गोव्याच्या राज्यपालांनी 29 आणि 30 मार्च रोजी विधानसभेचं विशेष अधिवेशन बोलावलं आहे. या अधिवेशनात सरकारची कोंडी करण्यासाठी काँग्रेससह आप एकत्र येत रणनीती आखली जात आहे. यासंदर्भात झालेल्या विशेष बैठकीला काँग्रेस आणि आपचे (Aam Aadmi Party) आमदार उपस्थित होते. भाजपविरोधात लढण्यासाठी आप आणि काँग्रेस एकत्र आल्याचं बाणावलीचे आमदार वेंझी व्हिएगस यांनी स्पष्ट केलं आहे.

काँग्रेसचे ज्येष्ठ नेते आणि मडगावचे आमदार दिगंबर कामत (Digambar Kamat) यांनी आपली भूमिका स्पष्ट केली आहे. फातोर्ड्याचे आमदार विजय सरदेसाई आणि सांत आंद्रेचे रिव्हॉल्युशनरी गोवन्सचे आमदार विरेश बोरकर हे काही कारणांमुळे बैठकीला उपस्थित राहु शकले नाहीत. मात्र त्यांचाही या विरोधीगटाला पाठिंबा असून भाजपविरोधात लढण्यासाठी सर्व विरोधक सज्ज असल्याचं कामत यांनी स्पष्ट केलं आहे. दरम्यान नुवेचे आमदार आलेक्स सिक्वेरा यांचं नाव विधानसभा अध्यक्षपदासाठी काँग्रेसकडून (Congress) निश्चित करण्यात आलं असून मंगळवारी होणाऱ्या विधानसभा अध्यक्षपदाच्या निवडणुकीत सिक्वेरा भाजपच्या उमेदवाराला आव्हान देणार आहेत.