पणजी : गोवा विधानसभा निवडणुकीसाठी काँग्रेसने आपली उमेदवारांची दुसरी यादी जाहीर केली आहे. या यादीसोबतच काँग्रेसने गोवा फॉरवर्ड पक्षाला दोन जागाही दिल्या आहेत. मात्र यामुळे गोवा फॉरवर्डच्या संभाव्य उमेदवारांची चांगलीच गोची झाल्याचं चित्र आहे. (Congress allotted only 2 seats to Goa Forward Party)

गोवा विधानसभेच्या (Goa Assembly Election) पार्श्वभूमीवर काँग्रेसने गोवा फॉरवर्ड पक्षासोबत युती केली होती. त्याचा जागावाटपाचा फॉर्म्युलाही ठरला होता. या जागावाटपात दक्षिण गोव्यात फातोर्डा आणि उत्तर गोव्यात मये हे दोन मतदारसंघ काँग्रेसने (Congress) गोवा फॉरवर्डसाठी सोडले आहेत. गोवा काँग्रेसचे प्रभारी दिनेश गुंडू राव यांनी याबाबत घोषणा केली आहे.

दरम्यान फातोर्डा मतदारसंघात गोवा फॉरवर्डचे (Goa Forward Party) अध्यक्ष आणि आमदार विजय सरदेसाई, तर मये मतदारसंघात संतोष कुमार सावंत हे फॉरवर्डचे उमेदवार आहेत. केवळ दोनच जागा मिळाल्याने शिवोलीमधील विद्यमान आमदार विनोद पालयेकर यांच्यासह मांद्रे मतदारसंघात दीपक कळंगुटकर आणि सांत आंद्रेमध्ये जगदीश भोबे यांची उमेदवारी धोक्यात आल्याचं चित्र आहे.