वास्को: झुआरीनगर येथील वीज खात्याच्या कार्यालयाच्या फाटकासमोर असलेल्या सुलभ शौचालयांची पूर्णपणे दुर्दशा झाल्याने आसपासच्या रहिवाशांना त्रास सहन करावा लागत आहे. संबंधित कंत्राटदाराकडे तक्रारी करूनही काहीच हालचाल होत नसल्याने नागरिक संताप व्यक्त करत आहेत.

एकीकडे केंद्र सरकार घरोघरी शौचालय बांधून देण्यासाठी प्रयत्न करीत आहे, तर दुसरीकडे असलेल्या सुलभ शौचालयांच्या देखभालीकडे लक्ष देण्यास कोणी तयार नाही. झुआरीनगरामध्ये ७ सुलभ शौचालये आहेत. त्यातील बहुतांश शौचालयांची दुर्दशा झाली आहे.

काही पर्याय नसल्याने आसपासचे रहिवासी नाइलाजास्तव त्या शौचालयांचा वापर करतात. यातील वीज खात्याच्या कार्यालयाच्या गेटसमोर असलेल्या सुलभ शौचालयाची बरीच दुर्दशा आली आहे. या शौचालयांची दुरुस्ती करण्यात यावी, अशी मागणी होत आहे.

सांडपाणी वाहते उघड्यावर

मोडतोड झालेल्या शौचालयांचा वापर करण्यात येत नसल्याने त्यामध्ये कचरा जमा झाला आहे. तेथील टाक्यांची स्वच्छता न केल्याने दुर्गंधी पसरली असून सांडपाणी सुलभ शौचालयाच्या मागच्या बाजूने उघड्यावर वाहत आहे. येथील नळाचीही मोडतोड झाली आहे. तसेच तेथील पिंपात पावसाचे पाणी जमा होऊन डासांची उत्पत्ती होत आहे.