Show Cause Notice

शिक्षण संचालनालयाची परवानगी नसताना किंवा अनुदानित शाळा असतानाही पालकांकडून बेकायदा शुल्क आकारणी केल्याबद्दल कुजिरा येथील मुष्टिफंड हायस्कूलला कारणे दाखवा नोटीस बजावण्यात आल्याची माहिती संचालक शैलेश झिंगडे यांनी दिली.

अनुदानित शाळांना कोणतेही शुल्क आकारता येत नाही, तरीही ते आकारत असतील तर ते बेकायदेशीर आहे, असेही त्यांनी 'गोमन्तक 'शी बोलताना स्पष्ट केले.

अ‍ॅड. सावियो ब्रागांझा यांनी मार्च महिन्यात शिक्षण संचालनालयाकडे लेखी तक्रार केली होती. या तक्रारीची दखल घेऊन शिक्षणमंत्री तथा मुख्यमंत्री डॉ. प्रमोद सावंत यांच्याशी चर्चा करूनच ही कारवाईची पावले उचलली आहेत.

शिक्षण संचालनालयाला मुख्यमंत्र्यांकडून कारवाईस परवानगी मिळताच त्यांनी तत्काळ मुष्टिफंड शिक्षण संस्थेला कारणे दाखवा नोटीस बजावली आहे.

सात दिवसांत स्पष्टीकरण द्या !

शिक्षण संचालनालयाने बजावलेल्या नोटिसीमध्ये मुष्टिफंड हायस्कूल, कुजिरा यांना बेकायदेशीरपणे शुल्क आकारणे/वसुली करणे/घेणे/आकारणे आणि पूर्वमंजुरीशिवाय असा निधी निर्माण केल्याबद्दल दाखवा नोटीस जारी केली आहे. डीओईने सांगितले की, शाळेने ७ दिवसांच्या आत उत्तर द्यायचे आहे.