केपे : केपे सरकारी महाविद्यालयात प्रथम वर्ष वाणिज्य शाखेत शिकणाऱ्या कुडचडे येथील कविता दळवी (19) या युवतीने टोकाचे पाऊल उचलत आत्महत्या केली आहे. ही युवती मूळ खानापूर येथील रहिवाशी आहे. या युवतीने गळफास घेऊन आत्महत्या केली आहे. कुडचडे (curchorem) पोलिसांनी दिलेल्या माहितीनुसार मूळ खानापूर येथील कविता दळवी यांचे कुटुंबीय कुडचडे येथे भाड्याच्या खोलीत राहत होते.

आज संध्याकाळी तिचा मृतदेह पंख्याला लटकताना कुटुंबियांना दिसला. हे दृष्य पाहून आई-वडील भयभीत झाले. त्यांनी काही वेळातच या घटनेची माहिती पोलिसांना दिली. पोलिसांनी घटनास्थळी धाव घेऊन घटनेचा पंचनामा करून मृतदेह खाली घेतला. अचानक झालेल्या या प्रकारामुळे त्यांच्या कुटुंबियांवर दुःखाचा डोंगर कोसळला आहे. युवतीने आत्महत्या (suicide) का केली? याचे कारण अद्याप समजले नाही. या घटनेमुळे परिसरात खळबळ उडाली आहे. तिच्या पश्चात आई वडील व भाऊ असा परिवार आहे. पोलिसांनी मृतदेह शवविच्छेदनासाठी पाठवला असून पुढील तपास कुडचडे पोलीस (police) करत आहेत.