पणजी: गोव्यात सध्या विधानसभा निवडणुकीची रणधुमाळी सुरू आहे. कॉंग्रेस आणि भाजपला राजनैतिक आव्हान देण्यासाठी आम आदमी पार्टीचे अरविंद केजरीवाल आणि तृणमूल कॉंग्रेसच्या ममता बॅनर्जी यांनी आपला मोर्चा गोव्याकडे वळवला आहे. या वाढत्या आव्हानामुळे सत्ताधारी भाजप 'बॅक फुटवर' जाणार का? अशी चर्चा राजकीय वर्तुळात सुरू आहे. (Pramod Sawant on Utpal Parrikar Candidature)

दरम्यान मुख्यमंत्री प्रमोद सावंत (Pramod Sawant) यांनी भाजपच्या प्रचाराची धुरा आपल्या हातात घेतली आहे. पत्रकारांशी बोलताना ते म्हणाले, "आम्ही मनोहर पर्रीकरांचे काम पुढे सुरू ठेवले आहे. त्यांच्या आशीर्वादाने आम्ही गोव्याचा विकास करत आहोत. कोविडकाळात मी लोकांबरोबर उभा आहे. मी तळागाळात जाऊन काम केले आहे. लोक भाजप बरोबर उभे आहेत."

यावेळेस त्यांनी आम आदमी पार्टी (AAP) आणि तृणमूल कॉंग्रेसवर निशाणा साधला. ते म्हणाले, "त्या पक्षांनी स्वतच्या राज्यांकडे लक्ष द्यावे. ते इथे फक्त निवडणुकीसाठी आलेले आहेत. अरविंद केजरीवाल (Arvind Kejriwal) दिल्लीच्या लोकांचे पैसे गोव्यात जाहिरतबाजी करण्यासाठी वापरत आहेत. त्यांनी आधी दिल्लीच्या तरुणांना पैसे द्यावेत. या पक्षांच्या आगमनामुळे काही मतदारसंघात कॉंग्रेचे नुकसान होईल, असे देखील त्यांनी नमूद केले.

उत्पल पर्रीकर यांच्या नाराजी नाट्यांवर बोलण्याचे सावंत यांनी टाळले. उत्पल पर्रीकर यांना भाजप उमेदवारी देणार का, असे विचारले असता त्यांनी भाजपच्या वरिष्ठ नेत्यांना पुढे केले. ते म्हणाले, पक्षाचे वरिष्ठ नेते उत्पल पर्रीकर यांच्या उमेदवारीवर निर्णय घेतील.