Goa CM Pramod Sawant Tributes To Mahatma Gandhi: गोव्यात मागील काही दिवसांत धार्मिक भावना दुखावण्याच्या अनेक घटना घडत आहेत. धार्मिक भावना दुखावणाऱ्यांवर कडक कारवाई केली जाणार आहे.

जातीय सलोखा बिघडवण्याचा गोष्टी कदापि सहन केल्या जाणार नाहीत असा इशारा मुख्यमंत्री डॉ. प्रमोद सावंत यांनी दिला.

ओल्ड गोवा येथे महात्मा गांधी जयंती कार्यक्रमात ते बोलत होते. यावेळी त्यांनी धार्मिक भावना दुखावणाऱ्यांवर भाष्य केले.

यावेळी कार्यक्रमाला केंद्रीय मंत्री श्रीपाद नाईक, आमदार राजेश फळदेसाई, इतर मान्यवर उपस्थित होते. मुख्यमंत्र्यांनी गांधीजींच्या पुतळ्याला हार घालून आदरांजली वाहिली

यावेळी मुख्यमंत्री म्हणाले, महात्मा गांधींनी सर्वधर्म समभावाची शिकवण दिली आहे. राज्यात मागील काही दिवसांत दुसऱ्या धर्माचा द्वेष करणाऱ्या पोस्ट सोशल मीडियावर शेअर करुन धार्मिक भावना दुखावण्याच्या अनेक घटना घडल्या आहेत.

असे प्रकार सरकार सहन करणार नाही. अशा संबंधित समाजकंटकांवर कडक कारवाई करण्यात येईल. सर्व धर्माचे लोक गोव्यात गुण्यागोविंदाने राहतात. त्यामुळे कोणीच दुसऱ्याच्या धर्माचा द्वेष करू नये. सर्वांनी आपल्या धर्माचे पालन करावे असे आवाहन मुख्यमंत्र्यांनी केले.

अंत्योदय, ग्रामोदय आणि सर्वोदय ही गांधीजींची संकल्पना पुढे नेण्यासाठी गोवा सरकार प्रयत्न करत असल्याचेही मुख्यमंत्र्यांनी सांगितले.