पणजी : दुसऱ्यांदा मुख्यमंत्रीपदी विराजमान होताच डॉ. प्रमोद सावंत यांनी कामाचा सपाटा लावला आहे. याचाच एक भाग म्हणून मुख्यमंत्र्यांनी चोर्ला घाट ते साखळी या रस्त्याच्या कामाच्या चौकशीचे आदेश दिले आहेत. चौकशी पूर्ण होईपर्यंत संबंधित रस्त्याचे अभियंत्यांना निलंबित करण्यात येणार आहे.

चोर्ला घाट - साखळी रस्त्याच्या कामाच्या चौकशीचे आदेश मुख्यमंत्री डॉ. प्रमोद सावंत (Pramod Sawant) यांनी दिले आहेत. चौकशी पूर्ण होईपर्यंत संबंधित कनिष्ठ अभियंते व सहाय्यक अभियंते निलंबित राहणार आहेत. रस्त्यांच्या कामाचे आता ऑडिट होणार असून याचा खर्च कंत्राटदाराकडून वसूल करणार असल्याचं मुख्यमंत्री प्रमोद सावंत यांनी स्पष्ट केलं आहे..

गेल्या 3 वर्षांतील मोठ्या रस्त्यांच्या डांबरीकरणाच्या चौकशीचे (Enquiry) आदेश मुख्यमंत्री सावंतांनी दिले आहेत. कामकाज हाती घेतल्यानंतर मुख्यमंत्र्यांनी बेशिस्त आणि कामचुकार अधिकाऱ्यांना दणका दिला असून त्यांच्यावर कारवाईचे संकेत दिले आहेत. गेल्या काही महिन्यांमध्ये रस्त्यांच्या निकृष्ट कामाच्या तक्रारी मुख्यमंत्र्यांना (CM) प्राप्त झाल्या होत्या. आता मुख्यमंत्र्यांनी कारवाईचं हत्यार उपसल्याने अधिकाऱ्यांचं मात्र धाबं दणाणलं आहे.